ORANJESTAD – Aruba y Hulanda a participa den e Cumbre de Las Americas como un delegacion di Reino, durante cual ambos Prome Minister, Mark Rutte y Mike Eman, a presenta cu hopi esfuerso e dos metanan cu kier logra durante e encuentro aki: haya apoyo pa e concepto di Aruba como hub entre Europa y America y busca apoyo pa candidatura di Hulanda pa bira miembro di Conseho di Siguridad di Nacionnan Uni.

Prome Minister Mike Eman na final di e ‘Cumbre de Las Americas’ tabata satisfecho con e encuentronan a desaroya y e forma con Hulanda y Aruba a traha hunto pa mustra e metanan cu kier a logra.

Un di e prome aspectonan cu kier a trece dilanti tabata pa establece e posicion di Reino pa su vision cu a desaroya pa Centro, Latino America, Merca y Caribe. A propone pa Aruba hunga un rol importante pa Hulanda y Europa, basa riba e conocemento cu nos tin di e region pa bira e conexion entre e dos continentenan.

E ta un tema cu, segun e mandatario Arubian Prome Minister Rutte a enfatisa hopi riba dje, cu e concepto aki ta algo cu e ta kere aden y cu tin apoyo di Hulanda. “Dos partner di Reino a enfatisa e balor adicional cu e cooperacion strategico entre Hulanda y Aruba tin pa un relacion comercial, diplomatico, social, y cultural pa paisnan den region. E ta un concepto cu Aruba a bin ta enfocando riba dje ultimo añanan y ta hayando su acogida. Den tur reunion cu hefenan di estado nos a haya oportunidad pa splica e vision aki pa haci e oferta di loke Hulanda por nifica y establecimento di instancianan di Hulanda na Aruba por yuda cune,” Prome Minister Eman a bisa. E concepto a wordo bon splica na tur e Presidentenan cu a combersa cu nan. Prome Minister Rutte a haci esaki tambe cu hopi entusiasmo cada bes papiando di Aruba cu hopi afecto y admiracion pa e vision di e isla y Aruba di su banda mustrando e balor grandi cu e relacion cu Aruba tin cu Hulanda ta nifica pa stabilidad, diplomacia y defensa. Tur e sinergia aki a wordo presenta den forma positivo, e mandatario a señala.

E di dos aspecto cu a combersa di dje na e cumbre, na cual Presidente di Merca Barack Obama tambe tabata presente, tabata e eleccion di Conseho di Siguridad di Nacionnan Uni na 2016. E Conseho aki ta un cuerpo hopi distingui di Nacionnan Uni, cu ta tuma decisionnan importante ora di retonan grandi na mundo. E cantidad di miembronan ta limita pa cual cada tanto aña tin eleccion y Hulanda no ta un miembro awor pero kier forma parti di e Conseho di Siguridad y pa esaki mester di e voto di e miembronan di Nacionnan Uni. Aruba tin un rol pro-activo, segun Eman, pa apoya e candidatura di Hulanda, uzando e contactonan cu paisnan Caribense y den Sur America. Hunto cu Prome Minister Rutte a presenta e candidatura di Hulanda na diferente Presidente presente na Panama. “Nos ta spera cu nos esfuersonan duna resultado pero e campaña pa esaki ta algo cu mester sigui cune te cu 2016, apesar cu algun a duna nan compromiso caba. Aruba ta haciendo un esfuerso grandi, pasobra un voz di Reino den Conseho di Siguridad ta un voz di nos y hunto cu nos Caribe y Latino America. Den cuadro ey a desaroya un relacion hopi strategico entre Gobierno di Hulanda y esun di Aruba cu e posicion aki por wordo adkeri pa Reino Hulandes,” e mandatario a bisa.

Expresionnan haci den e articulo aki no necesariamente ta refleha opinion di ArenaPoliti.co