Loke a resalta durante ‘Cumbre de Las Americas’ 

ORANJESTAD- Diabierna cu a pasa Prome Minister Eman y un delegacion a biaha pa Panama pa asisiti na e ‘Cumbre de Las Americas’, e cumbre mas importante di e region. Na su yegada Eman a topa mes ora cu Prome Minister di Hulanda Mark Rutte. Nan a papia cu otro y despues a atende algun reunion hunto.

Diasabra durante dia e reunionnan a sigui den tempo rapido y den forma masha eficiente. Por califica e presencia di Aruba na Panama como un bishita cu hopi reunion y encuentro uno tras di otro. Agenda intensivo y yena cu reunionnan importante pa Reino Hulandes. Presencia di Prome Minister Eman y su delegacion ta un muestra cla cu Aruba ta un sosten esencial pa Hulanda pa loke ta e region y area di Caribe. Prome Minister Hulandes Mark Rutte durante su presencia na Panama kier ilustra bon cla cu Hulanda ta presente den Caribe pa medio di e paisnan Aruba, Curacao y St Maarten. Ademas di mantene contactonan existente ta purba pa haci mas cu e diferente temanan di interes cu tur e paisnan tin.

Durante tur encuentro Prome Minister Rutte ta presente hunto cu Prome Minister Eman. Rutte ta introduci Eman como su di dos lider di delegacion di Reino den e ‘Cumbre de Las Americas’. Indicativo ta cu Aruba ta keda un partner fuerte pa Hulanda den e region y area di Caribe. Den tur e reunionnan Prome Minister Mike Eman ta presenta ideanan realistico y ta indica con hopi ta e formanan cu por traha hunto den Caribe Hulandes. Diasabra den oranan di mainta Rutte y Eman a topa cu Prome Minister di Jamaica sra. Portia Simpson-Miller, sigui pa e prome fase di e Cumbre de Las Americas. Despues a reuni cu Presidente Dilma Rousseff di Brasil, siguientemente a reuni cu Organization of American States (OAS), a topa den un encuentro oficial cu Evo Morales, Presidente di Bolivia y tambe a reuni basta largo cu Enrique Peña Nieto Presidente di Mexico. Un di e reunionnan di hopi importancia tambe pa e delegacion Hulandes y cu duracion largo tabata cu Presidente Juan Manuel Santos di Colombia. Diasabra por wordo considera un dia exitoso, fructifero cu hopi expectativa pa e delegacion di Reino Hulandes. Varios tema actual y interesante a wordo discuti. Prome Minister Eman a mustra kico tur Aruba y su hendenan por y a subraya e bentahanan di e posicion strategico di e isla y su relacion cu Hulanda cu ta un miembro di Union Europeo. 

Expresionnan haci den e articulo aki no necesariamente ta refleha opinion di ArenaPoliti.co