Ya caba den pasado - na momento cu a bin cu e Decreto Real (Koninklijk Besluit) aña pasa - Union Patriotico Progresista (UPP) a indica cu esaki nos a tume cu sentimentonan mixto.
Mientras cu varios tabata esnan cu tabata di hubilo, UPP a purba na trece e forum politico hunto pa asina, como un frente nacional, por a delibera y amplia riba posibel solucionnan.
UPP e tempo ey a propone pa bin cu un CUMBRE NACIONAL y for di eynan bay enfrenta Hulanda.
Condicionnan tabata entre otro pa Gobierno bay cas, y na su lugar bini un gobierno di transicion, cu lo mester a percura pa un lista di medidanan interno na nivel di gobernacion, di parlamento y naturalmente na nivel constitucional, y preparacion di un eleccion riba termino, despues cu cambionan esencial a wordo pasa, cu consentimento di e Cumbre Nacional y di Parlamento di Aruba.

Entretanto nos ta un aña mas leu, y loke nos por mira ta cu - enbes nos mes tuma e medidanan mas esencial, manera un propio organo di control financiero, un propio instancia independiente cu ta promove integridad gubernamental y cu lo mester percura pa vigila e proceso electoral y democratico (sponsormente di campaña politico e.o.) - ta Hulanda keto bay ta poniendo e presion.
Pa scapa di un Algemene Maatregel van Rijksbestuur, Prome Minister Mike E. ta prefera di yega na un acuerdo cu Gobierno di Hulanda pa asina torno na e tiki legitimidad parlamentario, autonomia y derecho di budget (presupuesto) cu a keda, pa esaki bay tambe den man di gobierno Hulandes.

Corectamente Camara di Comercio, den su comunicado di 26 di mei ultimo, ta bisa cu e protocol firma ta uno di supervision financiero, y cu ta un paso cu consecuencianan di inmediato y ta uno di largo plazo.
Loke UPP ta desaproba ta cu e comunicado di Camara ta uno cu ta mustra di ta di hubilo. Camara ta aplaudi esaki, alegando cu nan ta acuerdo cu esaki mirando e rumbo cu finanzas publico a tuma.
Loke UPP kier a mustra riba dje, ta cu esaki parce “mosterd na de maaltijd”, mirando cu ya desde 2010 paulatinamente Camara di Comercio a bin ta participa na varios di e dialogonan social cu a yuda PINTA e situacion cu nos ta aden BUNITA, ya cu durante di dialogonan social aki e participantenan, e gremionan, no a convence gobierno cu e rumbo financiero-economico cu nan a escohe, NO ta esun mas propicio pa Aruba.
Al contrario a scohe pa wine & dine cu gobierno.

Cu Gabinete Mike E. ta pusha den strot di parlamento e ley cu ta caba cu nan autoridad, pa Camara parce di ta un bon noticia, ya cu ta Aruba mes ta tuma e medida aki atraves di ley aki na Aruba, y no cu e ta wordo imponi.
Segun Camara un medida di Reino asina lo a causa hopi mas turbulencia den comunidad, ya cu e ta duna nos e oportunidad pa nos bay “back on track” y haya acceso na prestamo internacional.
Aki Camara di Comercio un biaha mas ta peca cu transparencia, pasobra deliberadamente NO ta bisa cu ya e texto di e ley a wordo skirbi door di e ambtenaarnan hulandes na Den Haag.

Alabes UPP ta lamenta cu Camara di Comercio no ta pronuncia su mes riba e forma con gobernacion ta wordo hiba, tampoco riba desaroyonan negativo, tanto pa locual ta trata turismo como nos poblacion laboral.
Si un tempo Camara di Comercio su vision tabata pa yega na un Aruba basa riba e concepto di nos “grandura” den tur sentido y nos “capacidad di carga”, nos por mira cu durante e ultimo 5 añanan grandemente Camara di Comercio no a uza esaki den su standard “ideologico” mas. Awor diripiente ta importante pa nos por haya caminda pa presta placa, sin importa si Parlamento di Aruba ta wordo reduci na parlamento manera un “Eilandsraad”.
Un otro pronunciamento cu nos no por a scucha di Camara di Comercio den e ultimo cinco añanan, ta e aspecto di “good governance” y di “transparency”.
Awor ta aplaudi, pasobra den e acuerdo, cu ta bira ley, lo bay tin mas control riba loke ta transparencia den entidadnan liga na gobernacion.
Segun Camara di Comercio ta pa añanan ta boga p’esey, pero pa straño cu ta zona, na momento cu Dialogo Social a papia e.o. riba Urirama, riba baha of hisa prijs di coriente y awa, no por a pone presion pa bini cu e transparencia tan desea aki?
Kico nos tin di spera; cu ta e mesun hendenan cu a hedge nos Pueblo, ta esunnan cu tin di resolve e problemanan aki? Dicon nos no ta tende cu p.e. mester baha e cantidadnan di ministernan, no na 7, sino na 6 of 5?

Den un otro comunicado nos a reitira e necesidad di un Cumbre Nacional unda cu lo mester bin cu un Gabinete di Emergencia of di Transicion.
Aruba NO mester di un Minister Presidente cu ta cana rond verf y corta yerbe, sino uno cu hunto cu e comunidad y parlamento ta tuma e decision apropia pa saca nos Aruba for di e cataclismo.
Y no un Minister Presidente cu - pa keda den e stoel ey - ta entrega nos autonomia por medio di un protocol.
E hecho aki ta motibo cu varios partidonan politico y awor Camara di Comercio tambe, ta di hubilo.
Pero, pa ta di hubilo pasobra Hulanda a skirbi un ley y a impone un ley na unda Parlamento ta entrega su autoridad, den opinion di UPP, esaki no ta corecto.
Mientras cu tin mas caminda pa yega Roma, nos mester purba cana esaki, unda cu interes general mester prevalece y na unda Aruba ta keda cu e autonomia cu tanto nos a lucha p’e.


Den nomber di Union Patriotico Progresista – U.P.P.
Candelario A. S. D. – Booshi – Wever
Brazil, juni 3, 2015

Expresionnan haci den e articulo aki no necesariamente ta refleha opinion di ArenaPoliti.co