Na aña 2010 caba mi a yega di declara cu Hulanda a re-descubri Aruba. E tempo ey ainda AVP tabata den "honeymoon" cu Hulanda, y mi a wordo yama pa tur tipo di nomber. For di e tempo ey caba, nos por a ripara cu Aruba su gobierno bow guia di Mike E. tabata hiba deliberacionnan cu Hulanda, y tabata yega na acuerdonan cu Hulanda, cu tabata tin ingredientenan cu por ser considera como entreguista. Mike E. y AVP tabata nenga esaki redondamente. Na varios ocasion UPP a mustra riba declaracionnan y cartanan di ministernan y parlamentarionan Hulandes cu ta papia palabranan cla. Poco poco, pero sigur Hulanda tabata "sluip" den e poder politico aki na Aruba. Naturalmente cu colaboracion di AVP.

Nos a mustra caba riba e hecho cu Mike E. y AVP a bay di acuerdo cu nan kier forma parti di e Reino nobo manera describi den e rapport di Donner, titula " Toekomst van het Koninkrijk". Den e rapport aki Donner ta bisa cla y raspa cu si Aruba kier forma parti di e Reino nobo, Aruba mester acepta e "randvoorwaarden" cu ta wordo menciona den dicho rapport. Y e "randvoorwaarden " ta e.o. cu Aruba mester bay di acuerdo cu e leynan di consenso cu ta vigente pa Corsow y St. Maarten, cu ta encera un supervision riba e terenonan financiero y di husticia. Y no lubida cu den mesun rapport aki Donner ta bisa cu Aruba mester scohe pa UPG tambe. Y Mike E. a bay di acuerdo cu esaki tambe.

Y por medio di e protocol di 24 di october 2011 y e acuerdo di Diahuebs Santo, Hulanda y Aruba a combini cu lo bay tin un tipo di supervision financiero di parti di Hulanda bow e capa di "Samenwerking"!! Dia 3 di juli 2014 a bay mas leu! A conveni cu lo bin un investigacion riba e situacion financiero di Aruba. Corda cu esaki a bin pasobra NO a cumpli cu e palabracionnan hací anteriormente. Den e acuerdo aki ta referi na CFT sin menciona CFT. Pero esaki ta parti di henter e wega. AVP y Mike E. kier evita di usa e nomber CFT, pasobra esaki ta e organo cu a ser institui a base di e leynan di consenso cu ta conta pa Corsow y St. Maarten.

Den curso di siman pasa a sali den medionan di comunicacion cu lo bay bin un KB of un AMRB cu ta encera oficialmente un supervision financiero di parti di Hulanda. Mescos cu aña pasá, nos no tabata di hubilo, pasobra esaki lo ta un ofensa pa nos pueblo y pa tur esnan cu a lucha asina fuerte pa nos por a logra nos Status Aparte. E momento ey Mike E. a pone su "spindocters" traha pa wak con pa haci "damage -control", y esakinan cu tin contactonan cu politiconan hulandes, lo a presenta un plan SORPRESA cu a conducí cu a "stel uit" e loke Hulanda tin den tapara. Pa Hulanda no ta importante con bo kier yama e organo cu lo bay tin na su encargo e supervision, loke ta interesa Hulanda ta, cu E tin e control. No ta pornada e advertencia a bay pa Aruba, esta bo ta cumpli cu PALABRACIONNAN hací "goedschiks of kwaadschiks", pero e control y e supervision lo bin.

E pregunta ta: dicon Hulanda tin tanto purá asina? Si nan tabata sa di e situacion for di aña 2010 caba, na unda Mike E. y AVP tabata derocha placa na nan antoho, y tabata endeuda nos Pais sin misericordia???!! E contesta ta simpel. Hulanda ta haya control riba Aruba SIN CU ELA COSTA NAN NI UN DEBCHI. Contrario cu ta e caso cu Corsow y St. Maarten. Pa Hulanda por a haya e supervision financiero, Hulanda mester a scupi varios biyon di florin. Mescos cu den pasado Aruba a ser bendí pa puesto di minister, e biaha aki Aruba a wordo bendí pa e Hamber pa poder, y tambe pa evita cu investigacionnan bin riba e actonan di corupcion cometí door di varios gobernantenan di AVP.

Cu e traicion aki di Mike E. Aruba no solamente a perde su autonomia financiero, pero de facto nos a perde tur autonomia tambe. Kiko un Pais ta haci si e no tin e control riba su finanzas publico??? Ni kiko esnan cu ta involvi den e makinaria di propaganda à la Goebbels, trata di haci, hecho ta cu Aruba a perde loke tanto ela lucha p’e. Si nos pueblo a sufri door di e dominio di Willemstad cu tin hopi menos poder cu Den Haag, corda awor cu nos lo bay cay bow di e poder di Den Haag.

Despues cu e topico di UPG a parce di a muri, ata Brinkman, e ex-minister hulandes (di D-66). kier duna e discusion riba UPG un bida atrobe. E miembro prominente aki di D-66, tata di princesa Leontine, a declara cu ta mihó pa Aruba scohe pa UPG. Y esaki sigur despues cu ela consultá cu Mike E.

Mike E. ultimo tempo a "heul" hopi cu Pechtholt, lider di D-66, cu por cierto ta creciendo enormemente na Hulanda. Nos mester ta alerto riba e desaroyo nobo aki, pasobra Mike E. y su aliadonan lo haci tur loke ta na nan alcanse pa evita pa haci mas daño na Mike E. mes y na AVP, sin importanan e consequencia negativo cu esaki lo por tin pa Aruba. E ora ey si nos ta mas leu di cas. Nos a sufri bow Willemstad, Dios sa con lo ta bow Den Haag, y no papia mes di Brussel. UPP lo no cansa di bisa cu loke Aruba mester di haci ta uni, y den un Cumbre Nacional bin cu palabracionnan concreto y conciso riba tereno di gobernacion, na unda e principionan di "Good Governance" mester ta punto di salida.

Alabes mester bin cu reformanan fundamental den nos leynan electoral, y pa despues di 6 luna yama eleccion. Cu otro palabra e gobierno actual no por keda. Y nos pueblo mester bisa, mescos cu Hulanda, esaki mester ta "goedschiks of kwaadschiks ".

Den nomber di Union Patriotico Progresista – U.P.P.
Candelario A. S. D. – Booshi – Wever
Brazil, april 27, 2015

Expresionnan haci den e articulo aki no necesariamente ta refleha opinion di ArenaPoliti.co