Den un articulo den Solo di Pueblo di diasabra, dia 25 di april 2015, sr. Jan de Ruiter a relata di e conferencia di prensa di diamars, dia 21 di april, den cua e grupo “Nos ta Aruba” a introduci su mes na Prensa di Aruba. Den e articulo ey sr. de Ruijter a splica tambe e meta tras di e grupo “Nos ta Aruba”.

Siguientemente un traduccion liber di e articulo:  

Kerido lectornan y ciudadanonan di Aruba:

Den e siman venidero lo mi dedica mi articulonan semanal (den Solo di Pueblo) na e plataforma di ciudadanonan “NOS TA ARUBA”.

Recientemente, esta diamars dia 21 di april, “Nos ta Aruba” e introduci su mes oficialmente na medionan di comunicacion, television, radio y prensa skirbi riba Aruba.

“Nos ta Aruba” ta un movemento di cooperacion a base voluntario entre e organisacionnan di pueblo “TA  BASTA”, “NOS  PASI  ARUBA”, “COMISION  ACCION  NACIONAL - CAN”, “Grupo 7”, sindicatonan TOPA, STA, SCCA, y un grupo considerabel di ciudadanonan prominente, kendenan tur ta extremadamente preocupa pa e desaster politico, economico, financiero y social, cu Pueblo di Aruba ya pa 5 aña ta experiencia.

“Nos ta Aruba” ta consisti di organisacionnan y ciudadanonan kendenan, cu trabao hopi duro, a yuda construi y edifica Aruba te na e exito grandi cu e tabata un tempo, pero kendenan no por y no kier sigui para wak con e pais bunita aki ta ser dirigi completamente den un rumbo di su perdicion y ruina. Nos di “Nos ta Aruba” awor ta dedica nos mes na e interes nacional di Aruba, y esey di henter nos curazon pa amor pa Aruba.

“NOS TA ARUBA” tin dos meta principal, esta:

1. exigi y impone bon gobernacion, profesional, decente, husto y transparente pa Aruba.

2. crea riba Aruba un Dialogo Nacional, den cua tur e 20 partidonan cu ta forma parti di e

     comunidad Arubano manera e clase trahador, dunadornan di trabao/patronnan,

     pensionadonan, salubridad publico, sector enseñanza, sector ayudo social, sector di

     construccion, ngo-nan, husticia y sector di seguridad, sector turismo, etc., tur lo

     mester tin un dialogo directamente cu e gobierno, pa por yega na un satisfaccion completo

     (“fulfillment”), pa por persigui y logra nan exito y alcanza nan felicidad.

Entretanto, “by now” e siguiente hechonan mester ta debidamente conoci cerca tur ciudadano di Aruba:

1) den tempo hopi cortico e gobierno aki a duplica e debe di Pais Aruba te cu ela yega na

     4 miljard (4.000.000.000,00 !!), y esaki door di presta, y gasta placa sin ningun control.

2) gobierno, kedando keto, a keda sin informa Parlamento di centenares di miyonnan di florin

    di dicho debenan haci.

3) conscientemente y deliberadamente gobierno a elimina tur e mecanismonan di control riba

     su gastonan, hasta Parlamento, cu de facto t’ey pa CONTROLA gobierno!

4) unicamente 1 (un !) porciento di e placa cu gobierno a presta, nan a inverti den bienestar di e

     Pueblo, y probablemente nan a mafia, y comete fraude masalmente. 

5) e debe cu a alcanza sumanan astronomico, no por ser paga back, sin causa daño, pena y

     dolor hopi grandi bao di e pueblo di Aruba.

6) na e momentonan aki nos ta constata cu riba nos pais Aruba, un pais unda nos ta orguyoso di

    nos democracia, nos ta sinta cu un gobernacion cu ta haci su mes culpabel na un negligencia

    serio, grave y intolerabel, un gobernacion masha malo (“onbehoorlijk bestuur”).

“NOS  TA  ARUBA”  P’ESEY  TA  SINTI  SU  MES  DEN  SU  DERECHO,  Y  TA  CONSIDERA  HUSTIFICA  PA  ACTUA  PA  PROTEHA  E  PUEBLO  DI  ARUBA  CONTRA  E  GOBIERNO  AKI,  Y  PA  EXIGI  Y  IMPONE  BON  GOBERNACION,  DECENTE,  HUSTO,  TRANSPARENTE  Y  PROFESIONAL.

“NOS TA ARUBA”  TA  OFRECE  E  PUEBLO  DI  ARUBA  NOS  YUDANZA  Y  SOSTEN,  PA  LOGRA  E  META  AKI  DOOR  DI:

1. logra  mediante Parlamento cu gobierno ta baha, of ta ser manda cas pa motibo di mal

    maneho (“wanbeleid”).

2. investiga tur caso di fraude y di corupcion, y esaki mester ser haci door di un comision

    INDEPENDIENTE di Reino di investigacion.

3. resolve e problemanan financiero di Pais Aruba, sin tuma mas medida contra e pueblo y

    comercio.

4. cancela tur e proyectonan PPP, cu excepcion di e proyectonan di cua por ser demostra

    cu nan ta util, necesario y rendabel pa Aruba.

5. no desmantela e refineria, a no ser cu tur esfuerso y oferta pa conserva e refineria, a ser

     evalua, y a agota.

6. envolvi e mihor profesionalnan riba Aruba den gobernacion di Aruba; esakinan mester ta e

     mihor specialistanan den nan experticio, mester a proba di ta integro, mester a proba di tin

     capacidad di maneho, y un bon mision y vision pa Pais Aruba.

7. investiga integridad di tur e ministernan, tur miembronan di Parlamento y hefe-/directornan

    di departamento; elimina tur sorto di inmunidad.

8. regula donacionnan na partidonan politico, y elimina obligacionnan na patrocinadornan.

9. afiliacion y participacion di tur gruponan (politico) pa asegura cu BON  GOBERNACION  Y 

    DECENTE ta keda algo permanente pa Aruba, na fabor di e bienestar y e prosperidad di un y

    tur, y na e interes general.

“NOS TA ARUBA”  A  LANTA  BO  INTERES  TAMBE?

BO  KIER  SIGUI  E  ACTIVIDADNAN  DI  “NOS TA ARUBA”,  Y  BO  KIER  AFILIA  NA  “NOS TA ARUBA”?

BO  KIER YUDA  HACI  “NOS TA ARUBA”  CRECE  TE  YEGA  NA  UN  FRENTE  NACIONAL?

Sigui lesa bo corant den e siguiente dianan.

 Den nomber di “NOS  TA  ARUBA”,            

Jan de Ruijter

This email address is being protected from spambots. You need JavaScript enabled to view it.

Oranjestad, april 25, 2015