E atentado contra paz y trankilidad di hende aki na Aruba cu a sosode diadomingo mainta ta e di tanto atentado contra di nos pais. Pa nos esaki mester caba awor. Nos ta bisa awor: TA BASTA. TE AKI BOSO A YEGA. Nos ta pone e lider di MEP y tur esnan den partido MEP responsabel pa  loke a sosode y pa tur e consecuencianan di esaki.  Nos NO ta yama pa violencia. Tur lo contrario. Nos a pidi tur hende pa condena loke a sosode den pasado y awor. Nos a pidi y nos lo sigui bidi autoridad di polis y ministerio publico pa actua di acuerdo cu ley, pa para e violacion di ley y atentadonan contra e Paz, Trankilidad y Libertad di tur hende aki na Aruba. Pero nos NO ta bay tolera nada mas di e grupo di hende aki y menos aun di esnan cu ta sostene y apoya nan. Specificamente e lidernan di MEP. Nos NO ta bay para man crusa mientras cu nan ta kibra nos pais y autoridad di polis y ministerio publico ta pensa con pa actua. Nos NO ta bay laga e hendenan aki kibra e pais cu nos ta construyende pa nos TUR.

KEDA CALMO
Nos a y ta pidi nos hendenan pa keda calmo. Pa no busca confrontacion ni represaya. Pero tampoco nos ta bay sigui wanta e atentadonan aki contra di nos pais y nos hendenan. Nos ta bay defende nos Pais y nos hendenan cu tur instrumento cu ley ta permiti. Pero nos NO lo ria pa defende nos Aruba y nos hendenan den TUR forma cu ta necesario. Loke a sosode diadomingo mainta cu Mike Eman, NO ta un incidente isola. E ta un acto premedita pa causa daño. E por sosode cu cualkier uno di nos. Loke a sosode NO ta expresion liber. E ta otro abuso di e libertad cu nos pais ta duna. Ora Bo abusa di e libertad Bo ta kibr’e. Nos NO ta bay para wak esey sin defende. Loke a sosode diadomingo cu Mike, ta e ultimo den un racha di accion y atentado contra libertad, trankilidad di nos tur aki na Aruba. Laga mi menciona djis un par di otro atentado di e ultimo aña:

• - Cendemento di auto dilanti di Parlamento
• - Cendemento di candela tras di edificio di Parlamento
• - Cendemento di candela den airco pafor di edificio di gobierno
• - Tiramento di bottel pa dal Presidente di Parlamento sra Marisol Lopez Tromp, ora ela bay ricibi hendenan cu tabata protesta. Nan a tir’e dos biaha cu bottel y kibra propiedad publico.
• - Ofende y insulta y menasa hende, incluso di miembronan di fraccion di AVP tur dia na radio, corant y riba Face Book
• - Menasa y insulta hende riba caya

PETICION NA MINISTER DI HUSTICIA
Nos ta bay pidi e minister di Husticia awe pa laga autoridadnan envestiga tur avenida cu ley ta duna pa para e destrucion y di libertad den nos pais. Pa para e ofensanan, e insultonan, e amenasa y violencia di e grupo aki y di esnan cu ta sostene nan. Nos ta bay pidi e minister pa laga envestiga cua leynan y cua instrumentonan autoridadnan tin mester pa sigura TUR hende aki na Aruba, e libertad, e seguridad y e integridad personal cu nos CONSTITUCION ta bisa cu nos tin. Nos mester sigura tur hende aki na Aruba, cu nan tin e libertad cu Constitucion ta duna nan di berdad! Mientrastanto nos kier avisa tur esnan cu ta participa den e accionan contra di nos pais y tur esnan cu ta sostene nan, cu ta guia y instrui nan, nos ta avisa e lidernan di MEP, cu ta te aki Boso a yega cu e menasa y ofensanan aki. Nos ta pone Boso responsabel pa tur loke Boso a y ta haci, pa tur consecuencia di Boso accionnan y pa TUR loke sosode door di esaki di awor en adelante tambe. TA BASTA. TE AKI BOSO A YEGA!

Expresionnan haci den e articulo aki no necesariamente ta refleha opinion di ArenaPoliti.co