Awor cu pueblo a condena nan comportacion di violencia y amenasa

Diadomingo mainta, apenas un rato despues cu e fanaticonan di MEP bou nomber di "Grupo di 7" a agredi y ofende Mike Eman ora e tabata core cu su casa den su tempo liber, e lider di MEP y otro lidernan di e partido a elogia y sostene e accion bergonsoso aki. Diadomingo y dialuna a sali critica y desaprobacion di tur skina di Aruba contra di e falta di respet, e ofensa y insultonan di e grupo di MEP aki. E critica y desaprobacion aki ta asina grandi cu e mes un dia e lider di MEP a dicidi di kita loke ela pone riba Face Book. Dialuna den dia y anochi e lidernan di MEP a cuminsa busca forma pa scapa nan cara y core pa nan responsabilidad pa loke nan a haci. Diamars mainta e lider di MEP a declara cu e no ta responsabel pa loke a sosode. Otro lidernan di MEP a hasta cuminsa bisa cu nan ta sinti nan mes amenasa. Nan a cuminsa bisa cu ta miembronan di AVP ta amenasa nan. Diripiente nan kier hunga victima, despues cu nan mes a pone hende agredi y ofende hende riba caya.

HYPOCRESIA
No tin otro palabra pa e hendenan aki cu HYPOCRITA. Nan ta tira piedra y awor kier sconde man. Awor cu pueblo a lanta bisa nan no! Esaki nos no ta accepta, e lidernan di MEP kier haci inocente. Nan ta custumbra di acusa hende di tur sorto di fechoria, pa despues resulta cu ta nan mes ta e abusadornan! Nan ta lastra tur hende cu nan no gusta den tur lodo y nan mes kier hunga limpi. Pa despues resulta cu ta nan ta esnan cu ta sushi di berdad. Nan a ofende y insulta Mike Eman. Pero awor cu pueblo mes a lanta bisa ta basta, nan no kier carga responsabilidad. Nan ta core sconde y hasta haci comosifuera ta nan ta wordo amenasa. Nada di esey ta berdad!

AVP
Awemainta e fraccion di AVP a para e wega di hipocrita di MEP. AVP a bisa TE AKI. AWOR TA BASTA! Cu esey AVP a manda un mensahe bon cla cu e abusadornan di MEP no por sigui cu nan comportacion inacceptabel y nan no por core pa nan responsabilidad tampoco. AVP a bisa nan bon cla awe cu e lidernan di MEP ta keda personalmente responsabel pa tur loke nan a haci y pa tur e consecuencianan di loke nan a haci. Aki no tin luga pa e wega di victima of di hipocrita.
Mes ora AVP a bisa bon cla cu esaki no ta trata di Mike Eman so. E ta pa proteha e libertad di cada hende aki na Aruba pa cana liber y sin peliger di wordo menasa y ofendi aki na Aruba. Tambe AVP a bisa bon cla cu e no ta instiga niun hende pa tuma revancha of pa tambe bay menasa of ofende niun hende. Tur lo contrario! Pero esnan cu a comete e abusonan te awor tin cu carga nan responsabilidad. Pasobra AVP ta bay pidi pa autoridadnan usa tur forsa di ley pa corigi y preveni loke a sosode. Tanten AVP ta keda alerta, pero no ta keda man crusa! AVP ta bay defende e libertad di cada hende na Aruba pa cana liber y biba liber na unda cu ta aki na Aruba.

Expresionnan haci den e articulo aki no necesariamente ta refleha opinion di ArenaPoliti.co