Pa di 22 biaha huez a dicta na fabor di Minister Otmar Oduber 

Diamars Corte Comun di Husticia a duna su veredicto den e caso cu Minister Otmar Oduber a apela contra Jan de Ruijter y pa di 22 biaha huez a dicta na fabor di Minister  Oduber.
Den e decision di Hof por lesa cu Jan de Ruijter mester rectifica dentro di 1 siman di tempo riba prome pagina di Solo di Pueblo y website Boletin Extra de lo contrario e mester paga un suma di mil Florin pa dia cu e no rectifica te na un maximo di 50 mil Florin.
Durante un encuentro cu prensa Minister Otmar Oduber a indica cu esaki ta e caso unda cu huez a bisa cu e no ta considera cu ta necesario pa trata e caso den un kort geding y cu a wordo interpreta p Sr. de Ruijter e tempo ey como un ‘carte blanche’ pa sigui insulata e mandatarioy bisa cu tabatin corupcion y actonan fraudulento den e casonan di entre otro Hard Rock Hotel y Casino. A base di esaki diferente satelite di MEP y e mesun MEP tabata colga na e declaracionnan aki continuamente.
Pero tur esey a yega na un fin, diamars mainta 3 huez a dicidi cu Sr. de Ruijter mester rectifica den Solo di Pueblo y boletinextra.com. Minister Oduber ta spera cu e otro medionan di comunicacion cu a sa di usa e expresionnan aki di Sr. de Ruijter usa e veredicto aki tambe y mustra riba e hecho cu e acusacionnan tabata totalmente riba un base falso.
Den e veredicto huez a pone den forma extenso, cual no ta sosode usualmente, tur lo cual Sr. de Ruijter mester rectifica. Esaki ta cu el a actua den un forma ilegitimo dor di a lanta e impresion robez cu e tin prueba di e validez di e acusacionnan presenta den e articulo contra Minister di Turismo, Transporte, Sector Primario y Cultura Otmar Oduber y tambe dor di a mara e acusacionnan aki na e conclusion cu Sr. Otmar Oduber ta corupto. E mester finaliza su rectificacion bisando cu e no tin nigun prueba di e validez di e acusacionnan y cu e no por a sca dicho conclusion.
Huez a pone tambe un dwangsom di mil Florin pa cada dia cu Sr. de Ruijter no cumpli cu sentencia di huez te na un maximo di 50 mil Florin y tambe mester paga pa e gastonan di Hof y tambe gastonan di Minister Oduber pa loke ta e kort geding.
Esaki ta e di 22 biaha cu huez ta dicta na fabor di Minister Otmar Oduber, cual mester ta un mensahe cla pa partido MEP y pa esnan manera Jan de Ruijter pa nan stop cu e tipo di acusacionnan aki. Minister Oduber ta spera cu nos medionan di comunicacion cu tin e tarea di educa pueblo, cu mester pasa e informacion corecto, pa midi e tipo di informacion cu ta wordo saca, pasobra esaki ta un vonnis cu a cay diamars, pero ta un caso cu tabata tumando lugar pa 11 luna. 11 luna durante cual algun medio di comunicacion, algun satelite di oposicion a keda usa e expresionnan di Sr. de Ruijter, lubidando cu comunidad di Aruba no ta wordo sirbi cune.
Minister Otmar Oduber ta spera cu esaki ta pone un final na e tipo di lastramento asina cu ta tuma lugar den nos comunidad. 

Expresionnan haci den e articulo aki no necesariamente ta refleha opinion di ArenaPoliti.co