Minister Otmar Oduber a bolbe gana un caso di rectificacion 

Diaranson mainta huez a duna sentencia den e caso di rectificacion cu Minister Otmar Oduber a lanta contra Francis Dijkhoff y manera por a spera, huez a dicta cu Sr. Dijkhoff mester resctifa den un termino di 72 ora, de lo contrario e mester paga un suma di min Florin pa dia te na un maximo di 1 miyon Florin.
Minister Oduber ta conciente cu como politico e mester tin lomba hancho pa diferente critica cu por bin den su contra. Hopi biaha por scucha na radio of lesa den corant y otro medionan, incluyendo medionan social e tipo di criticanan aki. Den caso di Sr. Dijkhoff, miembro di grupo di 7 y liga na partido MEP, pa varios siman no solamente el a critica, pero tambe a bin cu un serie di mentira atachando e nomber di Minister Otmar Oduber. E mentiranan aki, mescos cu esunnan di Jan de Ruijter cu den hof  tres huez a ordene pa rectifica tambe, ta wordo usa pa exponentenan di MEP unda cu nan ta ripitinan y bisa cu no ta nan a bisa sino cu a tende Sr. Dijkhoff of Sr. de Ruijter bisanan.
Den e mesun forma cu a lanta e caso contra Sr. de Ruijter, Minister Oduber a lanta e caso contra Sr. Dijkhoff pa su mes, su famia y pueblo di Aruba en general, kendenan mester ta convenci cu su politico y mandatarionan ta traha na un forma integro cu principio y balornan hopi halto.
Sentencia di huez contra Sr. Dijkhoff ta proba un biaha mas e integridad, principio y balornan di Minister Otmar Oduber. E mester rectifica e mentiranan cu el a bisa na radio ora cu a acusa Minister Oduber di ta usa droga, di ta transporta droga y cu a laga otro persona mata hende na Aruba y den exterior. Huez a bisa cu en berdad politiconan mester tin nan lomba hancho, pero den e caso aki Sr. Dijkhoff a cruza e liña di loke ta tolerabel den nos comunidad.
E sentencia di huez ta uno hopi cla y hasta a pone den dje cu mirando cu Sr. Dijkhoff a bisa cu e no lo rectifica, cu e dwangsom di mil Florin pa dia cu no bin rectificacion por yega te na un maximo di 1 miyon Florin.

Veredicto: KG Vonnis Otmar Oduber vs Francis Dijkhoff

Expresionnan haci den e articulo aki no necesariamente ta refleha opinion di ArenaPoliti.co