Hunto nos por lanta e servicio di Pais Aruba y di e producto cu nos ta representa 

Dialuna atardi Minister Otmar Oduber hunto cu ATA a lanza e campaña di concientizacion nobo “Duna Aruba e Miho di Bo. E ta bo compromiso”.  Durante e evento aki hunto cu e partnernan den e sector Minister Oduber a mustra riba e importancia pa nos traharonan ta sinti nan mes contento pa asina e por traspasa e sentimento aki na nos bishitantenan.

E mandatario ta convenci cu nos tin un di e miho productonan desaroya den e area aki. E ta referi tanto sector priva como sector publico cu ta traha masha duro diariamente pa Aruba por wordo reconoci internacionalmente. No tabata pornada cu den henter e maneho di Gobierno di Aruba ta poni e hecho cu nos hendenan mester ta central.

Sr. Oduber a splica cu un di atencion grandi cu nos ta pone awor y pa futuro di Aruba, ta riba e “happiness index” cu ta e grado pa cual, no solamente bo ta midi con satisfecho, con contento, con alegre e bishitante ta, pero mas importante ta midi con satisfecho y contento esnan cu ta labora den e industria turistico ta. Ta importante pa sa si nan ta contento, si nan sa cu nan ta den un bario cu nan por laga nan cas trankilo cu nan por bin nan trabou y sirbi y duna e miho di nan.

For di e dia cu a cuminsa papia di esaki, a inicia cu e campaña exitoso di “Mi Compromiso cu Aruba”. Minsiter a comenta cu “E sentido unda cada un persona mester realisa, cu nos por tin hopi fondonan pa mercadea, por tin e miho hotelnan den Caribe, nos por tin e miho producto akinan na Aruba, pa loke ta trata nos infrastructura y tur lo cual tin di haber cu un bon producto, pero cu e servicio ey, ta nos hendenan so por brinde di e forma cu nan ta brinde. Nos ta reconoci tambe rond mundo pa e servicio aki cu nos ta brinda. E compromiso ey cu nos a mustra nos hendenan, atraves di programanan manera esun di Aruba Certificacion Program, ta mustra e balor na trahadornan, ta mustra tambe cu hunto nos por lanta mas ainda e servicio di Pais Aruba y di e producto cu nos ta representa.” Pesey e slogan “Duna Aruba e Miho di Bo. E ta bo compromiso.” 

Siman pasa a sali publica cu Aruba ta e number un na mundo di paisnan cu ta depende totalmente riba e industria turistico. Pesey Minister Oduber a haci un peticion na tur propietario di negoshi aki na Aruba, no solamente esnan cu ta cerca di e industria di hospitalidad di Aruba pero tur otro negoshi tambe, pa realisa cu na Aruba na e momentonan aki mas di 90 porciento di e clase trahador sea directamente of indirectamente ta depende riba turismo y ta keda na cada un di nos pa duna Aruba e miho di nos, pa nos famia tambe por tin un miho futuro.

Minister Oduber a termina su discurso bisando “Masha masha danki na cada un di boso. Laga nos carga e mensahe aki hibe den tur skina di Aruba y cu nos por ta orguyoso na prome lugar di e industria di turismo, cu ta pone pan riba cada un mesa aki na Aruba... Y sigui duna Aruba e miho dibo.”

Expresionnan haci den e articulo aki no necesariamente ta refleha opinion di ArenaPoliti.co