Na 2011 e mayoria den Parlamento di Aruba a desvia di e Ley di Comptabilidad pa asina apodera Minister Sevinger pa por laga traha un caretera nobo for di Oranjestad pa Sanicolas cu un costo te cu 292 miyon florin. Awor 4 aña despues Minister Sevinger ta manda carta pa Parlamento pa informa cu e proyecto lo costa mas placa y cu pa esaki e kier pa Parlamento bay di acuerdo sin cu ningun hende sa ta ki gasto ta bin aserca y cuanto esaki lo costa e pagador di belasting. Nos Fraccion a pidi un reunion urgente cu e mandatario pa e duna splicacion, pero debi cu Minister Sevinger a biaha pa Brussel, Martinique y Miami, e mandatario no por a bin duna cuenta ainda na Parlamento di Aruba. Un cos ta sigur, e situacion financiero di nos Pais no ta brinda espacio pa duna Minister Sevinger check den blanco pa bay haci mas gasto y traha mas debe riba cabes di nos yuinan.

Proyecto ta mas caro cu premira
Minister Sevinger den su carta a informa Parlamento cu e proyecto lo costa mas cu 292 miyon ya cu mester tene na cuenta cu inflacion lo subi e prijs cu Gobierno mester paga y tambe cu lo por tin gastonan imprevisto. Remarcabel ta cu for di cifranan di Banco Central a sali na cla cu e proyecto aki su costo no ta mas na 292 miyon florin, pero tabata na 297 miyon florin caba na 2014. Banco Central a calcula cu Pueblo di Aruba lo mester bay paga 29,3 miyon pa 25 aña largo pa cubri e gastonan total di e proyecto cu lo suma un total di 732,5 miyon florin SIN conta gasto di interes. Esaki nota un wega y e suma aki no ta forma parti ainda di e 4 mil miyon na MEGADEBE di e Pais aki. Mirando e situacion financiero deplorabel cu nos Pais ta aden debi na e mal maneho financiero di Gabinete Eman ta imposibel pa Parlamento keda sin busca informacion y cuestiona e hecho cu Minister Sevinger kier haci mas gasto riba e proyecto aki.

Amigo den proyecto
Algo cu sigur a hala atencion tambe ta e hecho cu e compania Odinsa cu a gana e destaho pa design, construi, financia y mantene e Green Corridor a lanta un compania special na Aruba pa haci e trabounan y e representante di e compania parce di ta famia directo di hendenan masha serca di Minister Sevinger. Esaki sigur ta un conflicto di interes den e proyecto aki na unda cu kizas gastonan extra lo mester wordo haci pa asina beneficia amigonan serca di Minister Sevinger. Y nos no por descarta cu despues nos lo tende cu amigo di Minister ta haya trabou di subcontratista pa haci e trabounan pa Odinsa. Pesey ta na su lugar pa Minister Sevinger den un reunion publico duna un bon splicacion riba e posibel conflicto di interes aki.

Stroba desaroyo di nos yuinan
Por ultimo mester remarca cu Gabinete Eman no por keda traha mas debe riba cabes di nos yuinan. Tanto debe asina ta stroba e desaroyo di nos yuinan. Pasobra pa e proyecto aki so nos lo mester bay paga 29,3 miyon pa aña y contando aserca e otro proyectonan Private Public Partnership, esaki lo significa cu pa e proximo 25 aña nos lo paga 93,2 miyon pa aña na PPP so. Pues si casi 100 mil di e presupuesto di nos Pais bay na asfalt y beton, kiko ta resta pa inverti den educacion di nos yuinan? Banda di esaki lo ta hopi tristo si despues sali na cla cu tur gasto extra tabata djies pa beneficia amigonan serca di Minister Sevinger.

23 juni 2015

Expresionnan haci den e articulo aki no necesariamente ta refleha opinion di ArenaPoliti.co