ORANJESTAD – Relaciona cu intentonan pa bruha tera den opinion publico riba loke ta e proyecto di Green Corridor, Minister Benny Sevinger a dirigi su mes dialuna mainta na medionan di comunicacion. Aki el a bari tur e argumentonan incorecto treci dilanti di parti di oposicion.

Acuerdonan PPP (Private-Public Partnership) manera esun cu ta bay construi Green Corridor ta rekeri for di gobierno pagonan anual pa 18 aña largo. Pero esaki no kiermen cu ta hacie djis pasobra kier paga 18 aña largo. E motibo cu ta haci esaki, ta pasobra Pais Aruba, no tin e recursonan pa por haci e proyecto aki via destahonan convencional. “Nunca Aruba por tin e recursonan pa haci un proyecto di e magnitud aki riba su presupuesto anual,” Minister Sevinger a enfatisa y a agrega cu paisnan grandi mes ta recuri na proyectonan PPP pa nan por financia e tipo di proyectonan aki. Importante tambe ta, cu e desaroyador ta keda encarga pa mantene e proyecto pa henter e tempo cu gobierno ta paga. Esey kiermen cu gobierno nunca ta bay tin e gasto di tapa un buraco, drecha luz of cualke cos cu por kibra.

Como Minister di Infrastructura, Benny Sevinger a cana e caminda legal indica. For di 2009 a busca experto y prepara rapportnan pa scoge e miho opcion di plan. Na 2011 hunto cu DOW a presenta e cifranan na Parlamento pa aprobacion y a haya esaki. E mandatario a reitera cu ni Gabinete Mike Eman, ni ningun otro Gobierno por tin e placa aki riba su presupuesto anual pa un tipo di proyecto importante y di e magnitud aki.

Tin mester di banconan y consorcionan pa realisa un proyecto di e tipo aki. Un diferencia importante ta cu esnan cu gana e proyecto pa e Green Corridor, contrario na pasado, ta para responsabel pa e proyecto durante 18 aña. “No ta asina cu b’a caba di traha e cas, nan ta duna bo e yabi y bo cuenta cu ne,” Minister Sevinger a bisa pa ilustra e esencia di e proyecto aki. Gobierno no ta haya e yabi, pero ta us’e pa e periodo cumbini y den e caso aki, ta 18 aña.

“Si tin un buraco riba caminda y no por us’e , Gobierno no ta paga e consorcio; si tin un problema cu luz y nan no drech’e, nos ta aplica penalties pa esey. Pa 18 aña mantencion ta den man di e consorcio. Te na final di e 18 aña ora a caba di paga e contract, e ora ey ta tuma e riesgo over.”

Ademas di brinda mas siguridad riba caminda, e Green Corridor ta bay facilita e fluho di trafico entre San Nicolas y Oranjestad, hunto cu areanan di recreacion den henter e trayecto, mehoracion di barionan anexo y asina ta eleva e potencial pa desaroyo economico pariba di brug.

Expresionnan haci den e articulo aki no necesariamente ta refleha opinion di ArenaPoliti.co