Green Corridor ta referi na e proyecto cu tin menos impacto riba nos medio ambiente

ORANJESTAD – Leu di por ta relaciona na e color di un partido politico, e ‘Green’ den Green Corridor ta basa riba e hecho cu ta e opcion cu menos impacto riba nos medio ambiente. Asina Minister di Infrastructura Benny Sevinger a informa dialuna mainta durante un conferencia di prensa prome cu el a reuni cu Parlamento tocante e proyecto. Green Corridor ta un proyecto den cua ta bay construi un caminda nobo entre Oranjestad y San Nicolas cu ta hopi deteriora y ta evitando desaroyo economico na e parti pariba di nos isla.

Den pasado diferente gobiernonan a purba realisa e proyecto aki, pero nunca a yega mucho leu. E motibonan ta diferente, incluyendo cu no tabata tin suficiente boluntad, pero tambe cu no por a yega na cumpra tur e terenonan rekeri.

Bou di e gobierno anterior di MEP, e proyecto tabata conoci como “Vierbaansweg” y tabata pa bay pasa den cercania di Parke Arikok caminda cunukeronan lo a perde nan terenonan. Pesey e opcion ey nunca tabata algo factibel.

Gabinete Mike Eman I na 2009 a cuminsa traha dor di pidi conseho di expertonan den e tereno y a studia e diferente opcionnan y alternativanan posibel. E alternativa treci dilanti ta pa traha e caminda te Pos Chikito y for di eynan é ta parti den tres ader, un cu ta sigui stret te San Nicolas, otro na man robes via di Yara y na man drecha via Zeewijk; culminando tur na San Nicolas.

“Esey ta e opcion cu no mester drenta parke, no mester cumpra casnan riba caminda, y esun di mas pagabel tambe! E opcion ey nos a scoge p’e paso no tin hopi impacto riba nos medio ambiente y pesey e yama Green Corridor,” Minister Sevinger a duna di conoce, añadiendo cu tin un rapport cu ta confirma esaki.

E proyecto ta inicia su prome fase di construccion dentro di poco y tin un duracion di dos pa dos aña y mey. E ta un proyecto tipo PPP (Public Private Partnership) na balor di 292 miyon Florin, aproba dor di Parlamento na 2011 cu Gobierno di Aruba ta paga den un termino di 18 aña. Durante e termino aki, e desaroyador ta esun carga e mantencion di e proyecto.

Ademas di brinda mas siguridad riba caminda, e Green Corridor ta bay ofrece un miho fluho di trafico entre San Nicolas y Oranjestad. Ademas di esaki ta construi areanan di recreacion den henter e trayecto, mehora e barionan anexo y hisa e potencial pa desaroyo economico.

Expresionnan haci den e articulo aki no necesariamente ta refleha opinion di ArenaPoliti.co