Town Hall meeting exitoso di PARA  

Diaranson ultimo e organisacion PARA cu ta boga pa re-apertura di e refineria a tene un town hall meeting na Teresita Center na San Nicolas. Den e cuadro aki a invita varios orador, entre otro e lidernan di fraccion den parlamento ATIA San Nicolas Business Association y Camara di Comercio. 
Remarcable tabata cu pa AVP dos persona a sinta den e pannel, Rene Herde y Donny Rasmijn, mustrando un debilidad grandi di AVP. Pa MEP tabata presente Evelyn Wever-Croes y pa PDR Andin Bikker. E sala a yena trempan y emocionnan tabata hopi halto. 
Mesora cu e encuentro a cuminsa tabata obvio cu e gran mayoria di esnan presente no kier a scucha nada otro cu un compromiso fuerte pa re apertura di e refineria. 
E prome pa bisa lo contrario tabata Sr. Mansur den representacion di Camara di Comercio cu a indica cu Camara no ta kere den re apertura di refineria, y e publico a desaproba esey. 
Pa ATIA sr Henriquez a duna di conose cu e ta aplaudi e iniciativa di parlamento pa busca re apertura y ta spera cu tur esfuerso wordo hasi pa logra esey. Pero cu si resulta cu e no ta factible, cu tur hende ta 'move on'. 
Sr Hernandez di SNBA a indica cu nan ta sostene esfuersonan di PARA pasobra un San Nicolas sin e refineria ta un San Nicolas morto. 
E dos parlamentarionan di AVP Herde y Rasmijn tambe a purba trese nan puntonan dilanti, pero esnan presente no tabata sinti e honestidad den nan palabra. Esnan presente a mustra claramente cu nan no ta confia cu AVP kier habri e refineria y despues di cada contesta di Herde y Rasmijn tabata demostra esey. Hendenan tabata rabia cu AVP, cu Herde y cu Rasmijn y nan a demostra esey.
Hasta tabata tin un momento cu Donny Rasmijn a cuminsa tira cu lodo y bisa cu MEP a vota contra re apertura di e refineria, y lider di MEP Evelyn Wever-Croes mesora a par'e y mustr'e cu MEP ta e unico partido cu a logra re apertura di e refineria. 
E panel a contesta tur e preguntanan cu a bin di sala y e conclusion di e anochi ey ta cu e pueblo kier mira e refineria habri y cu nan kier mira Sr Nelson English den e comision pa traha pa re apertura di e refineria. 
Andin Bikker di PDR a indica cu e ta dispuesto pa bolbe propone na gobierno pa nombra Sr Nelson English den e comision 
Esun cu realmente a resalta e anochi aki tabata e lider di MEP Evelyn Wever-Croes cu tabata e unico cu a demostra cu e wega cu gobierno di AVP ta hungando no ta di confia y cu kier mira un papel mas pro activo di parlamento den e comision. "esakinan no ta temponan normal, esakinan ta tempo di crisis pasobra nos pais ta den bancarota y re apertura di nos refineria ta e unico salbacion. Pesey nos no mester permiti gobierno sigi hunga e wega aki pero nos mes mester asumi un rol mas activo. Nos no ta papiando di un simple compania aki, sino di un pilar economico di nos pais. Y pesey nos mester tuma rienda y no laga tur cos den man di gobierno so". Y esaki ta locual esnan presente kier a scucha. Un pabien na PARA cu un town hall meeting exitoso, y cu apesar di tur e emocionnan, a duna resultadonan importante. 

Expresionnan haci den e articulo aki no necesariamente ta refleha opinion di ArenaPoliti.co