Brindando sosten financiero, desaroyo personal y participacion social 

ORANJESTAD – Inicio di aña escolar nobo y Dia Internacional di Hubentud tabata e momento indica pa Minister di Hubentud hunto cu Minister President Mike Eman bin dilanti cu topiconan cu ta regarda e maneho publico pa cu mucha y hobennan. Drs. Paul Croes a indica con Gobierno di Aruba tin atencion tanto pa e desaroyo personal como pa e sosten financiero cu famia di menos entrada tin mester.

“Den vision di Gabinete Mike Eman obstaculonan financiero no por perhudica educacion di nos yiunan,” asina e titular a bisa. For di aña 2009 padilanti a bin ta aumenta e schoolkinderentoeslag pa asina por kita un dolor di cabes financiero for di famianan di menos recurso. Esaki ta un prioridad pa Gobierno cu e obhetivo pa e enfoke principal di nos muchanan y hobennan por ta dirigi riba nan educacion y nan desaroyo

Banda di e aporte financiero y e compromiso cu Gabinete Mike Eman a pone riba e desaroyo di nos hobennan, tin diferente otro proyecto y programanan di enfoke dirigi riba nos hobennan pa asina banda di e otro apoyonan cu nan ta ricibi, tambe ricibi e impulso y empuhe pa nan por desaroya nan talento na nan maximo.

“Hubentud ta un sector cu ta forma un di tres parti di e poblacion di nos pais, un sector cu ta participa den diferente trabounan boluntario, un sector importante riba nos mercado laboral, un sector cu merece pa nos dirigi nos atencion special riba nan.” Minister Drs. Croes a sigui na menciona e diferente proyecto y programa di Gabinete Mike Eman cu ta dirigi na hobennan manera Formacion Social cu ta un oportunidad pa subi mercado laboral y siña cursonan y cosnan adicional pa nan por ta miho prepara pa e desaroyo di nan bida.

Colega Minister di Husticia ta traha riba proyecto di Leerwerktraject mientras cu Minister President tin bou di su encargo introduccion di Naschoolseopvang pa scol secundario y programa di reconocemento ‘Hoben y Talentoso’ caminda ta enfoca riba e talento di nos hobennan cu ta pone Aruba su nomber riba plataforma internacional.

“Vision di e Gabinete completo ta mara na un maneho integral pa nos hobennan,” Minister Croes a bisa dunando otro ehempel manera ta ‘Poder di Hubentud’ cu a dura cinco luna na unda tin 15 hoben nomina y a haya curso di liderazgo y public speaking pa ta prepara pa un miho desaroyo di nan bida. “Nos ta trata na kita e obstaculonan financiero for di famianan y di otro banda dirigi riba talento pa encurasha nan den forma total.”

Pa cu inicio di aña escolar, Minister Croes a duna un mensahe tanto na e mucha y hobennan, como tambe na mayornan. “Cada un di boso ta importante pa nos y merece e atencion adicional como ta forma parti di nos sociedad. Pone e meta boso dilanti y kere cu bo ta logra esaki. Mayornan para tras di nos hobennan; guia nan, stimula nan, educa nan pa nos por tin un generacion di lidernan mañan.”

Expresionnan haci den e articulo aki no necesariamente ta refleha opinion di ArenaPoliti.co