E hecho cu partido MEP recientemente a denuncia e cortamento di subsidio na fundacionnan social, esaki a haya reaccion di parti di Minister Paul Croes kende no por a contene su frustacion mas y a haya ta bon pa ataca MEP bisando cu locual MEP a denuncia no ta cuadra cu realidad. Sinembargo ta parce cu Minister Paul Croes ta bibando den su mundo di fantasia y no ta mira e realidad cu ta biba bao di e fundacionnan social na Aruba. Tur esaki ta pa tapa fracaso di su gobierno pa loke ta e maneho di subsidio na fundacionnan social durante di e ultimo 2 añanan.

Mas placa pa malgasta
Hecho ta cu ya pa algun aña caba practicamente tur fundacion social na Aruba a conoce un reduccion drastico di nan subsidio. Tur hende por a lesa esaki den prensa local y familiarnan tabata den lamento constante pa tur e inhusticia y abuso cu gobierno di AVP a haci cu nan sernan keri. E reduccion aki a wordo haci cu e intencion pa Gabinete Mike Eman keda cu mas placa den caha pa nan por malgasta na nan antoho den nan viahenan di placer, huurmento di edificio di compinchinan, consultant y coordinadornan. Awor diripiente Minister Paul Croes a haya curashi pa ataca MEP lubidando completamente kico su persona y su gobierno a haci pa loke ta  cortamento di subsidio na fundacionnan social. Pa e biaha aki laga nos refresca Minister Paul Croes su memoria.

Fundacionnan perhudica

1. Fundacion pa cuido di nos grandinan (SABA): A ser corta drasticamente den nan subsidio y cual a conduci cu nos grandinan no ta haya juice pa bebe mas. Tambe e uso di airco a ser limita/elimina y no ta paga mas pa reparacion y mantencion di e airconan. Tambe e cantidad di personal pa traha den oranan di anochi a ser corta drasticamente.
   
   
2. Fundacion pa esnan cu limitacion (SVGA): A ser corta drasticamente den nan subsidio. Nos muchanan special no ta haya e gastonan di cuido dental cubri mas. Tambe e personal cu tin derecho riba nan gratificacion no ta haya esaki mas, te cu nan mester a welga pa algun ora y awor ta buscando nan derecho den Corte.
   
   
3. Casa Cuna: Nos muchanan den Casa Cuna a bira victima di e gobierno actual, caminda nan ta rogando pa haya extra placa pa cada mucha, ya cu aki tambe subsidio a ser corta.
   
   
4. Fundacion pa trata esnan cu adiccion (FMAA): Nan tambe a ser corta den nan subsidio y ta pesey mes un y tur por mira e cantidad grandi di esnan cu problema di adiccion (chollers) ta circulando tur dia den centro di ciudad.
   
   
5. Fundacion Desaroyo Educativo Comunitario (FDEC): Aki gobierno di AVP a corta e subsidio di e fundacion completamente y consecuentemente a elimina e fundacion aki. Esaki a perhudica miles di hobennan cu tabata haya educacion den arte y musica.
   
   
6. Fundacion Balansa Nobo: E fundacion su meta ta pa conseha personanan den comunidad con pa maneha nan finansa y con pa sali for di nan debenan. Gabinete Eman a corta e subsidio completamente, consecuentemente e fundacion aki tambe mester a dal su porta cera.
   
   

E bon Samaritano
Y asina tin mas fundacion social, manera entre otro Cede Aruba cu tambe a bira victima di e cortamento drastico di subsidio  durante e ultimo 2 añanan. Sinembargo awor den presupuesto 2016 Minister Paul Croes diripiente manera un “bon Samaritano” kier gaña tira poco pinda pa e fundacionnan social, despues cu den e añanan anterior su ministerio mes a corta drasticamente den e subsidionan aki. Pues por ehempel di un banda a corta 100 florin den un aña y e aña siguiente ta gaña tira 25 florin pa yena wowo di e fundacionnan aki y riba dje gabando cu e ta yudando e fundacionnan aki grandemente. Na e altura aki tur hende cu sano huicio mester ta consciente caba di tur e manipulacionnan aki di parti di Gabinete Mike Eman.

Expresionnan haci den e articulo aki no necesariamente ta refleha opinion di ArenaPoliti.co