Andin Bikker (PDR): Prome Minister a haya señalnan cla y raspa cu gobierno no ta bayendo den bon direccion
Diamars mainta den rueda di prensa di Partido Democracia Real, Andin Bikker a cuminza cu un analisis riba e resultado di e votacion di nos presupuesto pa 2016, y a bisa riba esaki cu prome minister sr. Eman mester saca su conclusion.
El a bisa esaki den sentido cu di e 13 parlamentarionan cu ta sostene gobierno apenas 11 a vota na fabor loke ta un señal di duda riba e presupuesto y di gobierno su maneho, segun Bikker.
E ta mira como un mensahe cu prome minister mester tene cuenta cune cu minimo un miembro di parlamento cu ta sostene su gabinete a sostene un mocion di desconfianza contra minister di infrastructura.
Bikker a bisa cu durante e speech manipulador di prome minister cu el a purba convence tur fraccion cu mester vota unanimamente na fabor, e no a logra di convence ni su mes fraccion, el a admiti cu tin cinco presupuesto irealisto caba cu gobierno a presenta.
Bikker a cuestiona prome minister cu a bisa cu e presupuesto di 2016 si mester wordo aproba pa tur fraccion pasobra esaki si ta cumpli cu e norma di 2% y ta realistico. Esey nifica cu el a admiti cu di 2011 pa 2015 tur e presupuestonan no a cumpli cu e normanan di bon gobernacion y bon finanzas.
Cu otro palabra el a admiti cu Hulanda tabatin razon, anto pakico a rabia y bay den welga di hamber? Segun Bikker, minister presidente den su afan pa convence hende, cu no a logra den su speech a cita un parti so di e conseho di Raad van Advies, unda ta bisa cu danki na e sectornan cu CAFT ta yama colectivo entre otro SVB lo tin un deficit mas abao cu 2%, pero den e mesun rosea como cu e presupuesto no ta realistico y nan a calcula e entradanan mucho halto, Raad van Advies no ta kere cu nan ta bay yega e margen di 2%.
Bikker a bisa cu prome minister a manipula (pa no bisa gaña) cu un parti di e conseho di e Raad van Advies y e linea cora cu nan a pone, pa purba use na su bentaha lagando afo e conclusion principal cu ta cu e presupuesto no ta realistico. Bikker a splica cu presupuesto ta dos cos: cifra y maneho.
Bikker a bisa cu riba cifra por debati y a splica cu awor tin un dimension nobo. Esaki kiermen cu bo no sa kico ta bay sosode cu e presupuesto, pasobra tempo aya ora Hulanda haya e presupuesto nan tabata bisa cu mester haci algo, usando e instrumentonan legal basa riba reglamento di Gobernador. E tempo ey Gobernador a haya hopi critica y Hulanda a dicidi di no laga Gobernador pasa den esey bek y for Mei aña pasa a bin cu e ley di CFT y a bisa Aruba cu tin cu acepte, gobierno a zapatea pero a acepta CFT y aworaki esey ta e regimen legal. Awor no mester manda afo boletin extra cu Gobernador a firma si of no. Aworaki esaki ta irelevante y aworaki cu e presupuesto a wordo aproba pa e minimo di 11 parlamentario pasobra menos cu esey no por, e ta bay den man di CFT y mirando cu tin deficit e CFT ta bay wak si e ta atene na e normanan cu ta ancra den CFT den e caso di esun di 2016 ta e 2%. E discusion ta bay bira si e ta haya afgekeurd di CFT of no.
Segun Bikker señor Eman mester realiza cu maneho di gobierno tambe a haya un señal fuerte for di Parlamento, y for di su propio seno unda cu e maneho di Infrastructura a wordo desaproba cu un mocion di desconfianza tambe cu sosten di un miembro di AVP.
Otro señal ta e ausencia di minister di turismo cu visiblemente no tabata tey durante e ultimo oranan di tratamento di presupuesto y aprobacion, mientras cu e ta minister cu na cuminzamento di aña a bin afo y bisa cu tin 9 punto den cual e ta den desacuerdo fuertemente cu Gabinete Eman y cu entrante 1 di Maart el a entrega su retiro aunke nan a retreat y ta parce cu ainda ta den combersacion.
Segun Bikker prome minister no por sigui persisti comosifuera e tin e miho gobernacion aki na Aruba pasobra el a redobla e debe nacional den apenas cuater aña di gobernacion pero e mester kita su mascara y admiti cu e tin un problema hopi serio y no por sigui insisti haci comosifuera cu nada ta pasando.
Andin Bikker ta haya cu e mensahe ta cla y raspa cu sr. Eman su gobierno no ta bayendo den bon direccion, y sigur mirando cu un di e ministernan cu ta carga un di e carteranan di mas peso pa nos economia esta Turismo, a entrega na prome minister un carta cu su 9 punto di preocupacion.
Y djis mey ora despues di su speech pa purba convence cu e presupuesto ta bon y cla pa pidi sosten unanime, dos parlamentario a dune un señal cu e no tin razon.
Segun Bikker sr. Eman no por pretende cu ta oposicion ta critica y haci fastioso, pasobra a bin resulta cu e criticanan aki ta funda y tanto e maneho di infrastructura como di husticia ta fayando. Pa loke ta Husticia e propio Minister Otmar Oduber den su speech den Parlamento a bisa atrobe cu husticia ta un di su puntonan cu el a hinca den e carta pa Gobernador. E otro puntonan no ta di conocimento di Parlamento pasobra e carta no a yega Staten aunke nan a pidi pe.
E responsabilidad di controla e presupuesto ta den man di CFT. Segun Andin Bikker pa motibo cu no tabata tin un instrumento legal Reino Hulandes a haci uso di e reglamento di ordo di Gobernador, y a base di esey a bin e discusion di esaki ta corecto si of no, y ta e propio gobierno di Aruba y e fraccion cu ta sostene a bay di acuerdo cu e ley di CAFT.
Expresionnan haci den e articulo aki no necesariamente ta refleha opinion di ArenaPoliti.co