STA CRUZ -- Partido MEP ta organisando e Congreso 2015, y Rudy Richardson ta na cabes di e Congreso. 

Segun nos Statuut cada 4 anja nos partido mester eligi un lider, y awor ta 4 anja caba cu sra. Evelyn Wever-Croes a wordo eligi. Pues ta toca turno pa nos organisa e Congreso 2015.
E preparacionnan ta practicamente cla y nos ta preparando pa un tremendo Congreso un biaha mas, cu varios invitado internacional di nos partidonan ruman den islanan y paisnan den region.

E Congreso 2015 lo tuma lugar diadomingo atardi, 27 september na Cas di Cultura. 
Cas di Cultura tin un significacion emocional hopi valioso pa partido MEP. Eyden  mayoria di Congresonan di MEP a tuma lugar. Eyden sr. Nel Oduber a wordo ACLAMA lider di partido, y sr. Betico Croes den felis memoria tambe a tene varios Congreso den Cas di Cultura. Un lugar pues cu nos tin recuerdonan bunita pa partido MEP.
Considerando tambe e gasto envolvi cu otro lugarnan y considerando e situacion financiero malisimo di Aruba, nos a scohe pa organisa Congreso 2015 na Cas di Cultura.

E Congreso 2015 ta habri pa tur hende, especialmente tur simpatisante di partido MEP, lidernan di bario, campanjadornan y nan famia. Pueblo di Aruba tambe ta keda invita pa e Congreso aki.
E mesun fin di siman partido MEP ta anfitrion di e Congreso di COPPPAL, cu ta Conferencia Permanente de Partidos Políticos de América Latina, y varios delegado di otro pais lo ta presente na nos Congreso.

Na final di e anochi nos lo tin un grandioso rifa di un auto Hyundai EON 2015, ticket ta na venta awor caba pa 5 florin.
E invitacion oficial y e programa oficial lo wordo publica den medionan di comunicacion den e siguiente dianan, manera nos Statuut ta prescribi. Entrada ta completamente gratis. Nos lo registra tur hende cu yega, y nos lo tin un regalito especial pa tur hende tambe.

Pa medio di esaki, den mi calidad di presidente di Congreso 2015, mi kier extende un invitación na Aruba en general, y na nos lidernan di bario, miembronan, simpatisantenan, votadornan y campanjadornan pa reserva e fecha aki y asisti na nos Congreso 2015, diadomingo 27 september  na Cas di Cultura.

Expresionnan haci den e articulo aki no necesariamente ta refleha opinion di ArenaPoliti.co