STA. CRUZ -- Durante e conferencia di prensa di MEP na Cede di MEP Parlamentario Glenbert Croes a splica cu partido Movimiento Electoral di Pueblo concientemente den conseho di partido a dicidi unanimamente pa aclama Evelyn Wever-Croes como lider atrobe pa e sigiente 4 anja. Esaki pa motibo e forma abrumador di e votonan cu nos lider haya riba su nomber ultimo eleccion, ta obvio cu e tin e voto popular y e mandato cu nos ta bai dune pa continua cu e labor 4 anja mas.

Como cuidadano, como tata, como mama, y como yiu di e pueblo aki nos mester hasi e refleccion den ken nos por confía e destino di nos yiunan, den man di Mike Eman of den man di Evelyn Wever-Croes. Evelyn Wever-Croes siendo un gran mama, un bon esposa, un profesional, un senjora integro y cu capacidad suficiente pa scapa nos pais di desgracianan cu gabinete Mike Eman a hinca nos aden.

Pesey nos partido consientemente ta propone Evelyn pa lidera no solamente nos partido, sino pa bai salba e pais di e desastre. Y pesey nos ta invita nos digno pueblo di Aruba pa e momento historico aki, pa aclama Evelyn no solamente como lider di MEP pa e proximo 4 anja, pero tambe cu e speransa cu nos ta deposita den dje como e lider pa guia nos pais pa asina e solo sali atrobe pa nos tur.

Riba pregunta di prensa di Glenbert mes tin deseo di lidera e partido cu su defunto tata a funda, Glenbert a duna di conose cu e ta aprecia enormemente e deseonan cu ta exisiti den comunidad di mira e como lider, pero mescos cu su defunto tata a bisa, no ta necesariamente su yiu di Betico mester bira lider di partido. Glenbert a sigi bisa cu e no a drenta MEP pa bira lider, el'a drenta MEP pa ta un di e soldatnan, pesey el'a pidi nr 29 y e ta aprecia enormemente e oportunidad cu el'a haya di forma parti di e gran famia di MEP. Glenbert ta respeta sentimento di partido pa e confiansa cu a wordo pon'i den Evelyn, y ta pidi pa awor laga nos tur deposita confiansa den e persona cu awor mihor por rescata nos pais, pa guía nos partido y nos pais. "Mi ta sumamente orguyoso di forma parti di e conseho di partido cu unanimamente ta sostene nos lider Evelyn", Glenbert a finalisa bisando.

Expresionnan haci den e articulo aki no necesariamente ta refleha opinion di ArenaPoliti.co