Ora no tin argumento ta bay over na mentira pa wak si nan ta pega  

Dialuna mainta Minister Otmar Oduber a desenmascara e cantidad di mentira cu opositornan politico ta presentando relaciona specialmente cu Aruparking. Uno pa uno, e mandatario a mustra cu documentonan den man con esnan den oposicion a bin ta gaña comunidad y a presenta e pruebanan di con e situacion real ta pa loke ta trata parkeermeters na nos isla.

Minister a bisa cu ta parse cu mentiranan a bira e forma nobo pa actua na momento cu no tin argumento pa atende cune; oposicion ta crea un cantidad di mentira rond di un politico/gobernante pa wak si un di nan ta pega. Pero den caso di Minister Otmar Oduber esaki no por wordo logra, pasobra semper e ta bin dilanti cu e berdad y transparencia necesario riba cada segmento di e maneho cu ta wordo hiba bou di su ministerionan.

Papiando di parkeermeters, el a bisa cu e proyecto aki a wordo institui mas o menos 7 siman pasa y ultimo siman a ricibi su resultadonan. Por mira cu poco, poco nos comunidad ta custumbrando cu e parkeermeters y ta realizando e facilidadnan cu esakinan ta crea manera por ehempel e reduccion di presion di trafico den centro di ciudad. Den e seis simannan di evaluacion por mira con continuamente e parkeermeters ta wordo usa mas y mas y ta hayando mas confianza. E resultadonan aki a wordo presenta na Camara di Comercio y su miembronan cu a acudi na e reunion cu Aruparking siman pasa.

Mientras tanto, opositornan cu tabata cla pa aproba e proyecto di parkeermeters na 2007, no solamente ta critica e proyecto, pero ta instiga nos hendenan pa no bay den centro di ciudad, pa no bay haci compras den centro di ciudad. “Mi ta puntra mi mes ta cu ki mentalidad oposicion ta opera si e ta kere cu haciendo esaki e ta perhudica e gobierno na mando. Bo ta perhudica e tiendanan, bo ta perhudica e confianza cu mester tin den comercio, bo ta perhudica e trahadornan cu ta traha den e area aki. Danki Dios e pueblo aki no ta duna oido na esaki, al contrario, mas y mas ta hayando e confianza”, Minister Otmar Oduber a declara.

Pa mustra e forma di actua di oposicion, e mandatario a desenmascara un pa un e mentiranan cu nan a bin ta treciendo relaciona cu Aruparking.

Den ultimo simannan hasta Sr. Nel Oduber a wordo saca for di su cunuco pa bisa comunidad cu 20 miyon Florin ta wordo ranca for di e pueblo cu e proyecto di parkeermeters. Contrario na e declaracion aki, Minister Oduber a bisa cu si parkeermeters genera 2 miyon Florin pa aña lo ta hopi bon. E suma aki lo bay directamente pa Arubus pa por mantene e subsidio ofreci na diferente gruponan den nos comunidad manera ta e pensionadonan y muchanan di scol.

Otro mentira presenta pa oposicion ta cu e edificio unda Aruparking ta ubica ta costa 75 mil Florin pa luna siendo cu e suma cu ta wordo paga pa huur pa luna ta 5.500 Florin. Posiblemente esnan di partido MEP a bruha den tempo y a bay bek ora nan tabata na mando, tempo cu nan si tabata paga e sumanan miyonario na papa y tanchi.

Un otro mentira cu oposicion a presenta ta cu lo a paga 220 mil Florin pa 30 klem cu a wordo cumpra. Contrario na esaki, a cumpra un total di 50 klem na 46 mil Florin. Ora esaki a bin dilanti a bay over na e campaña di bisa cu riba cierto websitenan por haya e klemnan na 80 Florin, cual por ta logico, inclusive lo por haya klemnan di hasta 5 Dollar. Diferencia grandi ta cu e klemnan cu a wordo cumpra pa Aruba a traves di un compania ta di hero y di un bon calidad. Minister Oduber a mustra tur prensa presente e documentonan en cuestion y hasta a mustra e invoice cu a wordo usa na aduana.

Expresionnan haci den e articulo aki no necesariamente ta refleha opinion di ArenaPoliti.co