Benny Nisbet (PPA): “Aru-Parking a mata centro di Oranjestad!”
![Nisbet01](/images/2016-press/Nisbet01.jpg)
E crisis financiero y e debe nacional causa pa maneho di x ministro di Finanzas sr. ing Mike de Meza alias THE MESS ta sigui causa hopi destruccion. Na prome lugar henter nos pueblo nos cartera ta worde sacrifica a consecuencia di un racha di medida cu e crisis financiero/debe nacional a causa. Mei mei di tur e racha di medida gobierno a scoge tambe pa NO sigui subsidia Arubus NV. Un subsidio cu majoria pais den mundo ta hasi como contribuicion na nan economia. Esaki a pone cu a bai analisa con Arubus NV lo por jega na e placa di subsidio y a bin cu e idea di introduci parkeermeters den centro di Oranjestad y hinca man den cartera di pueblo y bishitante atrobe.
E effecto di ARUPARKING den centro di Oranjestad ta devastador. Devastador pasobra e pueblo di Aruba no ta sinti cu e medida aki ta husto y ta scoge pa NO bishita centro di Oranjestad. Fuera di esaki e proceso di pone ‘klem’ riba auto ta worde considera un abuso di primera orden. Ta pesey un massa di hende a scoge pa stop di hasi nan compras na Oranjestad. Esey ta e realidad amargo cu ta affectando centro di Oranjestad !!
Awor por pensa riba mil y un idea ….por desea di evita di bisa cu ARU-PARKING lo mester worde elimina pero eynan e problema ta….shonnan…!! Aru – parking mester bai !! Aru-parking ta un abuso di otro mundo riba e cartera di pueblo arubano. Aru-parking ta mishi cu e sentimiento di pueblo pa hasi ‘shopping’ pa bishita e centro commercial di Aruba….y tanten cu gabinete Mike Eman no accepta e realidad aki …..Comercio di Oranjestad lo sufri na un forma dramatico. PPA tin tur intencion cu si pueblo duna nos e mandato pa regresa den parlamento/gobierno cu nos lo elemina e abuso aki dentro di e prome 100 dia di gobernacion. PPA no ta bai enganja ningun hende…drechamento di centro di Oranjestad ta inicia cu eliminacion di Aru- parking. Awor den e maneho di PPA nos lo busca soluccion pa evita cu esnan trajando pa Aru-parking perde nan trabao p.e. door di instala un grupo di seguridad cu ta cuida centro di Oranjestad !! Gobierno lo mester continua cu su ‘subsidio’ na Arubus NV y eynan e problema lo termina.
Na mes momento tin otro maneho cu por worde hiba pa mejora ‘shopping’ den Centro di Oranjestad. PPA ta evaluando:
- Habri caya bek pa trafico !!
- Crea un programa unda ta habri posibilidad di pa tin presentacionan di ‘Arte, Cultura, Musica’ na diferente sitio den centro di Oranjestad, creando un ambiente atractivo pa stimula pueblo y bishitante pa bishita centro di Oranjestad bek !!
- Stimula creaccion di benta di articulo/souvenir parti pariba di Centro di Oranjestad pa duna e turista motibo di baha for di e ‘street-trolley’ y hasi mas shopping.
- Crea un plan y mercadea nos centro di Oranjestad p/m di ‘presupuesto’ di ATA y departamento di Cultura y Departamento Economico.
- Cambia e tarea di esnan cu ta labora pa Aru-parking den un tarea positivo unda nan ta duna seguridad na esnan cu ta bishita Oranjestad y ta duna informacion na pueblo y turista…!!
Aruba, 24 di juni 2016 Lider Politico di PPA
BENNY NISBET
Expresionnan haci den e articulo aki no necesariamente ta refleha opinion di ArenaPoliti.co