Danki na cooperacion di Starlet Aruba 

ORANJESTAD – Parti di e recorido cu Prome Minister Mike Eman a haci ayera den un area di Madiki tabata bishita e veld di futbol Riverplate, como tambe combersa cu su directiva. Ademas di actualisa su mes den e proceso di renobacion di e facilidad, e mandatario tabatin honor di cende e señal cu di awor pa dilanti ta duna tur hende na e sitio aki, e señal gratis di WiFi. Esaki a tuma luga den presencia di miembronan di directiva, Ricardo Arends y Francy Arends, como tambe Gregory Odor, specialista tecnico di e compania di telecomunicacion Starlet Aruba, cu ta coopera cu e club deportivo brindando su servicio.

Esaki ta un tereno cu ya den pasado a haya bishita di Prome Minister Mike Eman durante un Accion di Bario, e tempo ey, hunto cu Minister di Infrastructura Benny Sevinger. Na e oportunidad ey a tuma nota di e necesidadnan di e tereno y clubhuis. Facilidadnan no tabata den e condicion adecua pa mucha, hoben y adulto di e bario por a haci uzo di nan na un manera sigur. Pesey mes, a traha hunto cu e directiva y a yega na maneranan con duna un man y haci e trabounan hopi necesario. E caminda no a caba ainda, pero directiva a duna di conoce cu cada bes nan ta un stap mas cerca di keda cla.

Minister President Eman a expresa di a keda impresiona pa e avance cu ya a logra, e area di clubhuis cu espacio pa reunion, cushina y tribunanan a keda hopi bon y bunita. “Mi ta kere Riverplate tin un bon facilidad pa por contribui na deporte, pero tambe contribui na un desaroyo sano di e bario di Madiki,” asina e mandatario a comenta. E tereno aki ta uni na esun di yerba artificial cu ta construyendo na Bushiri y un den otro area di Madiki pa brinda na e comunidad varios opcion di espacio di deporte, tambe recreacion.

A comenta cu Gabinete Mike Eman II a caba di aproba e proyecto pa desaroyo di Rancho, caminda e area residencial di e zona ta bay haya un infrastructura nobo, mescos cu a sosode caba cu varios otro bario rond di Aruba. Gobierno di Aruba ta busca pa e circulo di renobacion di nos isla ta cada bes ta bira mas grandi y un ta conecta cu otro. Danki na e sosten ricibi di sector publico, Club Deportivo Riverplate Madiki ta sigui traha duro pa crece y brinda un nivel halto di futbol pa tur hende den e bario y Aruba henter.

Expresionnan haci den e articulo aki no necesariamente ta refleha opinion di ArenaPoliti.co