Aña pasa 5 di augustus 2014, e minister cobarde Schwengle a declara cu PORFIN e asina yama "open-hart-operatie" por ser haci aki na Aruba, pasobra mi persona pa 8 aña largo a bringa cu e cardiologonan Arubiano.

Ta tristo pa constata con e minister mediocre aki cu den 2 aña no a dedica atencion ni na deporte, ni na nos Grandinan, y sigur no na salubridad, ta trata di tapa su incapacidad pa maneha su cartera criticando otro.

E realidad ta cu despues cu E hunto cu su gang di Ali Baba a priva nos pueblo di un cuido cardio-vascular total den IMSAN pa 6 aña, awor kier bin tira culpa riba mi persona.

Mi kier ta hopi cla den esaki, mi a bringa berdad CU un cardiologo cu a haci su mes culpabel na actonan inapropia cu ta core den miyones, y ta su partido AVP a lague "get-away with crime". Esaki ta e REALIDAD sunu. Cu e cobarde aki kier defende e tipo aki, mi ta lague pa su cuenta, pero e ora mi tin cu pensa "dime con quien andas y te diré quien eres"!!!!

Pero mi no a bringa CU e specialista aki so, pero mi a bringa tambe PA nos specialistanan yiunan di tera pa nan bin traha aki na Aruba, pasobra dr. Boesten tabata kier a yena HOH cu specialistanan Hulandes Europeo so, y si no tabata riba mi BRINGAMENTO PA e yiunan di tera, su persona awe no ta minister, y e lo no por play "superman", y e lo no por "cover-up" nada pa dos otro specialista cu mi persona a bringa pa nan a bin traha aki na Aruba. 

Dicon ABO no a bringa pa e longarts Arubiano bin traha na Aruba? No, dor di bo egoismo awe e yiu di tera ey, mester a bay traha na Corsow! Realidad y no insinuacion!!

 

Despues di e declaracion aki, na september 2014 AZV a bin cu e grato noticia cu e proyecto piloto tabata un exito rotundo y cu nan ta masha contento. Y nan ta spera cu pronto e tipo di operacionnan aki lo ser haci permanentemente aki na Aruba mes.

Dia 15 di juli 2015, e minister superman un biaha mas a haci yen di fanfaria riba e proyecto-piloto aki, cu e tambe ta masha contento. Y den mesun dianan ey, Universidad di Maastricht, a subraya cu nan tambe ta hopi contento y cu ta falta algun detayes pa regla pa concretisa henter e asunto aki y ta spera cu e cooperacion aki lo bira algo concreto y permanente.

Otro siman lo ta 4 luna cu e ultimo cu nos por a tende di e proyecto aki. Ta kiko a pasa anto? Aki atrobe e cobarde aki kier tapa e berdad?

Dicon no ta sali afo, mescos cu a haci aña pasa ora cu tabata asina contento? Dicon e mesun AZV no ta sali afo y bisa kiko a pasa? Si tur hende ta hopi contento, dicon un biaha mas ta priva nos pueblo di tipo di operacionnan aki na Aruba?

Of Maastricht a bula afo? Ta berdad cu nan a bula afo door di "corupt-gedrag" di e cardiologo cu e cobarde aki ta bisa cu mi a bringa cune? E director di HOH ta na altura?

E director di AZV, un biaha mas kier bin bisa cu e no sa di nada? Ta interesante pa sa si e presidente di e Raad van Commissarissen di AZV a ser poni na altura di e motibonan pakiko cu Maastricht a bula afo.

Dicon e minister cobarde aki no ta pone mas atencion riba su trabow como minister di Salud y mira kiko ta pasa rond di dje? Of e sa y e kier play santo y kier laba su man manera Pontius Pilatus? Kizas e lo por bisa, ya cu ela bira defensor di e cardiologo cu mi a bringa cune pa motibo di su actonan inapropia cu a costa pueblo miyones, kiko y ken ta enrikese su mes grandemente cu e pacemakernan? Dicon e no ta bisa ken ta e representante di St. Jude pa benta di pacemaker y aicd? Y dicon e no ta puntra su amigo si tin placa ta core manera aroz via

Caymann-islands?

Ta straño cu si e ta pone su atencion na su trabow como minister, e lo mester por sa cu cosnan asina ta pasa! Of esnan cu a ser poni na altura no ta tume na serio? 

Y si e ta na altura, dicon e no a tuma pasonan contra su amigo? 

Y si e no ta na altura, y si resulta cu director di AZV, Presidente di RvC di AZV, Directornan di HOH y Raad van Toezicht di HOH cu a ser poni na altura di e "modus-operandi" di e.o. su amigo cardiologo y no a pasa e informacionnan aki pa e minister cobarde aki, ki medida lo bay tuma contra nan? 

Of e no tin curashi pa actua contra nan? Dicon e no ta bisti e disfraz di superman awor y actua?

 

UPP un biaha mas a trece a asuntonan aki den publicidad, pasobra nos kier mustra cu tin hendenan cu no ta siña nan les y ta keda busca e "grens" di lo aceptabel y cu tin cu hasta kier pasa e "grens" ey y ta kere cu nan ta "untouchable"! 

Treciendo e asuntonan aki padilanti, nos kier sali na defensa di e specialistanan cu SI ta para pa nan patientnan y NO ta haci nan mes culpabel na actonan inapropia asina.

Nos ta convenci cu e gran mayoria di e specialistanan ta hendenan drechi y cu ta eherce nan profesion na un manera admirabel.

Y tur e asuntonan aki, den un gobernacion cu ta basa riba principionan di "Good Governance", tipo di actonan lo ser minimalisa y si mester tin sabinan cu ta kere cu nan por pasa e "grens" y "get-away" pasobra e minister, AZV, HOH etc. etc. por "cover-up" pa nan, e sistema di transparencia y "acountability" lo no permiti esaki. 

Ta p’esey ta di suma importancia pa yega na un Union pa nos tuma e Compromiso Nacional na serio pa evita cierto actonan asina sosode y hende keda cana rond manera nan ta e santonan mas santo cu Papa di Roma.

 

 

Den nomber di Union Patriotico Progresista – U.P.P.

Candelario A. S. D. – Booshi – Wever

Brazil, november 15, 2015