UPP a acusa tanto AZV, como gobierno y HOH, di ta purba di "cover-up" supuesto malversacionnan cu lo a tuma lugar door di cierto specialistanan, y e director di AZV a sali duna un declaracion na unda ela haci su maximo esfuerso pa purba di hustifica un acto cu por lo menos mester wordo categorisa como inapropia.

Na prome lugar UPP a bin ta compronde cu aki ta trata di algun specialista cu a wordo investiga.
Esaki ta nifica cu e sucedido no ta algo comun, y cu aki deliberadamente a trata di burla di reglanan cu nan coleganan SI a bin ta eherce.

Na di dos lugar e director a trata di duna un splicacion di e asunto di "waarneming met een gesloten beurs". Mediconan cu ta trahando pa nan propio cuenta aki na Aruba, pa motibo di un enfermedad repentino of pa motibo di un vakantie corto of bishita na un conferencia medico, mester cumpli cu e regla di AZV pa percura pa un reemplaso. Ora cu ta trata di un "gesloten beurs", ta palabra cu lo no paga pa e reemplaso, y tambe lo palabra por lo general cu e specialista encarga cu e reemplaso, lo NO manda e cobransa pa su mes na AZV, y cu e specialista cu ta ausente, ta cobra y e patient ta keda su patient.
En todo caso nunca lo por cobra dobbel, y e palabracion ta sosode den un forma ZUIVER, di BUENA FE y cu PALABRACIONNAN BON CLA!!

Na di tres lugar e director den su intento di purba di hustifica e cobramentonan inapropia aki, ta bisa cu e "waarneming" mester ta den balance. Esaki nifica cu e specialista cu tabata ausente, lo percura pa e reemplaso di su colega ora cu esaki ta necesario.
E balance ta encera cu e periodo di ausencia mester ta mas o menos den balance, como tambe e cantidad di operacion cu a tuma lugar durante di e reemplaso.
E "waarneming" ta den balance ora cu UN di e specialistanan SO ta cobra. E momento cu tur dos cobra, bo NO ta papia di un des-balance pero di FRAUDE.

E situacion ta completamente diferente ora cu e "waarneming met gesloten beurs" ta entre un specialista den servicio di HOH y un specialista cu ta traha pa su propio cuenta. Esun cu ta traha pa HOH, NO por cobra pasobra e ta den servicio di HOH, y HOH tin un budget cu AZV.
Esaki ta nifica cu ora cu esun cu ta traha pa su propio cuenta, mester "neem waar" pa esun den servicio di HOH, e tampoco mag di cobra.
Nos ta papia di un balance ora cu e periode ta mas o menos mescos. Esey no tin ningun problema, pero ora cu esun cu ta traha pa su propio cuenta, cobra toch ora cu e ta "neem waar" pa esun den servicio di HOH, e ora ey no ta cuenta cu no tin balance, aki nos ta papia di FRAUDE!!

Den opinion di UPP e director no por dicidi riba su mes - ora cu ta trata di e acto inapropia cu a wordo investiga - cu simpelmente no ta bay Ministerio Publico y ta dicidi cu lo bay cobra placa back.
Si e specialista cu ta traha pa su propio cuenta, a manda un cobransa toch pa AZV ora cu e ta cumpli cu e reemplaso di su colega cu ta den servicio di HOH, no solamente mester paga back, pero a comete un delito.
No ta na AZV pa huzga si e ta un "strafbaar feit" of no. Ta na Ministerio Publico pa dicidi esaki.

Un otro aspecto hopi peculiar ta unda e director ta declara cu no tin nada malo a pasa, y cu no tin fraude, y cu esnan cu a ser investiga, a declara cu e situacion ta den balance, pero den e mesun rosea ta declara cu ainda mester bay "wikkel af", y si lo mester cobra back loke a ser cobra di mas, lo bay haci esey.
Awor no solamente AZV kier hunga Ministerio Publico, pero kier hunga huez tambe. Si na prome instancia e mes ta bisa cu no tin nada malo a sosode, kiko tin di "wikkel af" anto??

Den su declaracion e ta bisa tambe cu e specialistanan a admiti di ta "neem waar" pa otro den un "gesloten beurs". Lo ta importante pa sa:
1. ta kende e specialistanan aki ta?
2. di cuanto placa ta papia aki?
3. cuanto specialista a wordo investiga?
4. pakiko mester a bin cu un cambio di maneho, si nada malo a pasa?
5. e declaracionnan cu a wordo entrega na AZV, tabata dobbel of pa un trabou cu no a wordo haci door di e specialista en cuestion?

Finalmente mi kier a puntra e director di AZV, con por ta posibel cu e dos ciruhanonan cu a ser investiga, tabata na mesun momento operando den e OK na HOH, y esun cu ta den servicio di HOH, na e momento ey "supuestamente" tabata "neem waar" pa e otro? "Gesloten beurs" no ta na e momento cu un ta malo of cu vakantie??

Dependiendo di contestanan y/of declaracionnan di esnan involvi, mi lo divulga mas detayenan, e.o. un ciruhano femenino cu tabata traha como ciruhano den servicio di HOH.


Den nomber di Union Patriotico Progresista – U.P.P.
Candelario A. S. D. – Booshi – Wever
Brazil, september 30, 2015

Expresionnan haci den e articulo aki no necesariamente ta refleha opinion di ArenaPoliti.co