"E serie di cambio cu nos a aproba den e ley di belasting e siman aki ta pa stimula inversion, ta bon pa comercio y ta bon pa gobierno. E impresion cu e lider di MEP a purba crea, di cu comercio ta contra di e ley ta totalmente incorecto. Den reunion dialuna mainta representantenan di comercio y industria, sector di hotel y di expertonan, mes a bisa cu nan ta contento cu e ley.

Hopi comerciante ta haci bon uso di e facilidadnan cu a crea. Solamente cu nan ta wak e necesidad pa mehora e forma cu e ley ta wordo aplica. Nan a haci sugerencianan pa haci e ley mas eficiente y cu menos obstaculo of predemento di tempo pa nan." Asina Rene Herde', e lider di fraccion di AVP den parlamento a bisa durante di e reunion den cua a trata y aproba e ley di belasting aki.

BENEFICIO

Cu rason e ley a wordo yama e ley cu ta beneficia sector di comersio y industria, pasobra e ley ta stimula inversion, e ta stimula comercio pa paga nan belasting mas lihe. Sigur awor cu nos pais tin tanto renobacion fisico y social andando.

BELASTING

Awor aki tin mas cu 2 biyon florin di belasting cu falta di paga riba caya. Lo dura hopi tempo pa yega na cobra esaki. Conciente di esaki y conciente di e necesidad ta sigui stimula economia di Aruba, a discuti diferente forma pa haci esaki den Dialogo Social. E pakete di cambionan cu a propone den e ley aki ta pa haci exactamente esey. E ta facilita e pagamento di belasting atrasa y preveni retraso den futuro. Specialmente pa comercio y industria cu ta e pagadornan mas grandi di belasting y prima na Aruba.

LIDER DI OPOSICION

Conciente di cu gobierno di AVP ta prefera di cobra e belasting atrasa, specialmente di sector di comercio, enbez di impone medida nobo manera MEP a haci semper, e lider di MEP cu ta un experto di belasting a cuminsa hopi tempo pasa ta bisa hende pa no paga belasting. Su meta ta pa gobierno no haya e placa cu ya e mester a haya y asina purba forsa gobierno pa bin cu medida. E lider di MEP kier pa AVP comete e mes un erornan cu MEP semper ta haci, pa e ora e purba mustra cu AVP tambe ta haci malo manera MEP. Enbez di contribui na funcionamento normal di nos pais, e lider di MEP ta sigui busca forma pa stroba. Su speransa ta pa crea intrankilidad na Aruba manera nan a purba tanto biaha caba. E fraccion di MEP a vota CONTRA e ley aki tambe. Asina nan a demostra cu hasta pa stimula economia y facilita comercio pa paga belasting, Aruba NO POR CONTA CU MEP.

Expresionnan haci den e articulo aki no necesariamente ta refleha opinion di ArenaPoliti.co