E comportacion di e miembronan di e fraccion di MEP den e reunion di diaranson tabata nada menos cu bochornoso. E insultonan, palabranan denigrante y ofensivo, palabranan cu bo no ta usa ni riba caya, laga para den Parlamento di nos pais, a skeiro for di e prome te cu e ultimo miembro di MEP cu a papia.

Nan tabata obviamente masha mal prepara y tabata papia un sin fin di cosnan cu no tabata tin di haci cu e leynan. Esnan cu a toca e tema a haci nada otro cu lesa di e raportnan oficial. Nan contribusion tabata atrobe bergonsoso, bou di nivel pa un Parlamento y un berguensa pa Aruba."Rene Herde di e fraccion di AVP no por a haya nada bon den e comportacion y contribucion di e fraccion di MEP den e reunion publico aki. Ta bon mes cu Pueblo por a scucha y wak e reunion pa Pueblo mes wak y tende nan.

BAHO

E punto mas abou di e reunion tabata ora e lider di MEP mes a acusa un miembro di e fraccion di AVP di a mata un hende. Ela haci esaki mientras cu e miembro di AVP tabata na palabra. Sin niun berguensa e lider di MEP a expresa esaki, pa despues baha cara. E reaccion den sala tabata un desaprobacion total. Rene Herde': "Nos a kere cu despues di tur e instigacion, intimidacion, agresion y destruccion door di e miembronan di MEP y nan fanaticonan contra di nos pais, cu nan lo a siña y sikiera purba cambia nan pensamento y comportacion. Den e reunion aki nos a wak cu ta envano pa spera cu MEP ta bay cambia nan comportacion. Nan ta keda mes destructivo, negativo, baho, vil y bochornoso."

AUSENCIA

Aparte di e echo cu miembronan di MEP no ta ni bay trabou, pero ta cobra sin niun berguensa na fin di luna, nan no ta prepara nan mes pa nan trabou pa representa pueblo y e siman aki atrobe nan a mustra cu nan ta sigui traha bou di tur nivel acceptabel den nos pais. Rene Herde': "Nos a keda sorprendi di wak algun miembro di MEP den sala cu pa algun luna caba no ta ni bin trabou. Nos a wak dos di nan cu segun nos a resusita, pasobra no a wak ni tende nada di nan den sigur tres luna cu a pasa. Un di nan a cana kibra sin niun berguensa ora e reunion ya caba tabata na mitar. Ela presenta sin niun documento, sin preparacion, e no a hiba palabra y djis a bisa CONTRA ora e lider a bis'e pa vota. E comportacion di e cinco miembronan di e fraccion di MEP cu tabata tey, tabata un berguensa di marca major. Pero pa colmo, Pueblo no por spera niun mehoracion di niun di e miembronan di MEP. Pa no papia mes di esnan cu no a ni bin trabou e siman aki tampoco. E cinco miembronan di MEP cu tabata tey tur a vota CONTRA di tur leynan pa stimula inversion den nos pais y pa facilita pagamento di belasting door di comercio y industria." Ta comprendibel cu Pueblo ta bisando cu NO POR SPERA NADA BON DI MEP.

Expresionnan haci den e articulo aki no necesariamente ta refleha opinion di ArenaPoliti.co