Evelyn Wever-Croes (MEP): Na ocasion di huramentacion di Griffier nobo di Parlamento [+audio]
GRIFFIER MESTER TA MANERA UN BARANCA DEN E LAMA BRUTO DI PARLAMENTO, MEMEY DI TUR CORIENTE
ORANJESTAD – Parlamento diahuebs ultimo a huramenta e Griffier nobo den persona di sr. Herman Hek. Sr. Hek no ta un desconosi pa Parlamento mirando cu el’a traha eynan den pasado, y despues a traha na Bezwaar Advies Commissie LAR. Aparte di esey sr. Hek ta comprometi cu varios actividad den comunidad, y entrante 1 di februari lo ta e Griffier nobo di Parlamento. Lider di Fraccion di MEP sra. Evelyn Wever-Croes a hiba e sigiente discurso na e occasion aki:
“Sr Hek permitimi toch prome cu mi dirigi mi mes na bo persona pa den nomber di nos fraccion nos gradisi sra. Williams pa e trabou cu ela hasi durante di e temporada cu e mester a tuma over di e griffier anterior cu sigur no tabata un tarea facil.
Sr. Hek, bon bini na Parlamento den e funcion di Griffier. E tarea di griffier ta uno dificil, pero no imposibel pa cumpli cune. Mi kier compara Parlamento cu un lama. Ta parsemi e comparasion mas miho posibel cu mi por a pensa riba dje. Parlamento ta manera un lama tin biaha bruto, tin biaha calmo, y cu diferente coriente. Y memey den e lama tin un baranca. Y e baranca ta e griffier.
E baranca cu mester tey tur ora, firme, stabil, trankil apesar di tur e corientenan pasobra ta rond di e baranca ey tur cos ta draai, ta riba e baranca ey nos tur ta conta.
Mi kier felicita bo na prome lugar cu bo nombracion, mi ta kere cu bo tin e elementonan cu bo mester tin pa bo por cumpli cu e tarea cu ta compara cu e baranca aki.
Bo tin e conosemento y e experiencia pa ehecuta e trabou cu lo contribui na e tarea aki pero principalemente e firmesa y trankilidad, e baranca cu nos mester den e lama turbulento di Parlamento memey di tur e corientenan.
Mi conosebo como un persona sumamente dedica y hopi serio, y sigur dispuesto pa brinda asistencia unda cu por y ki ora cu por. Mi ta deseabo hopi exito den e funcion nobo aki, y cu Dios guiabo den e trabou dificil aki”
Expresionnan haci den e articulo aki no necesariamente ta refleha opinion di ArenaPoliti.co