Minsiter Oduber durante reunion di presupuesto2016 den Parlamento 

Diabierna mainta a toca turno na Minister di Turismo, Transporte , Sector Primario y Cultura, Sr. Otmar Oduber pa contesta preguntanan dirigi na su persona durante e reunion den Parlamento riba presupuesto 2016. Riba e topico di turismo a resalta un biaha mas e exito di comberti oficina di turismo den un entidad priva. Cu privatisacion di ATA a logra cu durante 2015 a duna Aruba 22 miyon Florin y a logra un 18 miyon den nan reserva, enbes di costa Gobierno di Aruba placa manera tabata e caso ora e departamento aki tabata resorta bou di e organo gubernamental. Asina mes e mandatario a ricibi e critica di e fraccion di oposicion cu e ta introduci demasiado impuesto riba nos bishitantenan. Segun Minister Oduber cu e aumento den impuesto a percura pa mas turista y no a costa Aruba ni un cen. Sr. Oduber: "Kisas cu e preocupacion di fraccion di oposicion cu ta yama e situacion "tourist taxation" ta paso nan ta defende nos bishitantenan. For di e cartera di nos localnan ni un Florin ta wordo perhudica."
Minister di Turismo ta reitera e hecho cu instancianan manera Banco Central, CBS y e propio rapport di ATA ta ofrece cifranan pa demostra cu su maneho a duna un bon resultado. Aruba a conoce na 2009, 812 mil bishitante y awor e la aumenta te na 1.115 miyon bishitante. E mandatario ta bisa: "Den 6 aña di tempo Aruba a conoce un aumento di casi 300 mil bishitante. Cu e "taxation" manera nan ta yame, Aruba a conoce un aumento di 37 porciento. Pa locual ta trata Tourist Receipt tambe a aumenta di 2.1 biyon na 2009 pa 2.8 miyon awor. Un aumento di 700 miyon cu turista ta laga den economia di Aruba. Esakinan no ta cifranan di Otmar Oduber, nan ta cifranan di entidadnan oficial." E ta sigui menciona cifranan manera di RevPar cu a bay 127 Dollar pa 183 Dollar den 5 aña. Pa locual ta grado di ocupacion na 2009 e tabata un averahe di 72 % y awor e ta 78%. Den prijs di camber na 2009 e tabata 176 Dollar unda awor e ta te na 240 Dollar. Un aumento di 55 Dollar cu sin duda ta na beneficio di economia di nos pais. "Na momento cu ainda mi tabata den e posicion di Parlamentario den e stoel di oposicion e gobierno na mando e tempo ey a faya cu e linea crucero Carnaval Cruises. Den un delegacion cu mi coleganan cual awe ta forma parti di Gabinete Mike Eman II como minister, nos a bay reuni cu ehecutivonan di e linea crucero aki y a ricibi e confirmacion cu asina e gobierno cambia nan lo bin bek Aruba. Awe nos ta conta cu 49 calls durante henter aña. No manera e tabata den e Gobernacion anterior unda apenas tabata tin 7 barco entre e lunanan di mei pa october. Na 2009 Aruba tabatin 606 mil bishitante cu barco crucero pero e aña aki Aruba ta spera 678 mil bishitante di e barconan crucero. Tur esaki asina mes cu nos a aumenta e impuesto pa cada bishitante. " E mandatario ta sigui splica cu e lineanan crucero ta compronde e motibo cu a tuma e paso aki mirando e inversionnan grandi cu a tuma luga riba entre otro nos infrastructura pa mehoracion di Producto Aruba, haciendo esaki mas atractivo ainda pa nos bishitantenan.
Sr. Oduber :"E politica di 30 aña bieu no ta sirbi mas. Como parlamentario bo tin e tarea pa educa pueblo debidamente y no mal informa nan, manipulando cu cifras. Atrobe e fraccion aki ta actua inadecuadamente. Mescos cu na 2010 ora nan a vota contra privatisacion di ATA, un ley importante cu awe a demostra un resultado hopi faborabel pa nos turismo unda ATA cu un reserva di 18 miyon florin a duna Gobierno 22 miyon Florin cu tur su empleadonan cu ta hopi miho para cu antes."

Expresionnan haci den e articulo aki no necesariamente ta refleha opinion di ArenaPoliti.co