Manera aña 2016 a habri pueblo a haye confronta cu cobransanan di 2 aña pareu relaciona cu recohemento di sushi na cas. Na un promer instante nos di MEP a vocifera varios biaha cu esaki ta un medida inhusto y no na su lugar. Nos a hasta referi cu den pasado a bai pa cobra un suma simbolico pa e servicio aki pero esnan di AVP a dramatisa esaki sin ningun argumento valido djis pa hunga cu sentimento di pueblo. No mester ignora e hecho cu ultimo tempo ta hopi medida a wordo imponi riba pueblo su lomba y nos di MEP ta di opinion cu mester tene consideracion cu esaki. Cifranan di SERLIMAR berdad ta mustra cu e ta den situacion financiero fastioso pero na e otro banda cobransa halto di 25.25 pa luna a pone cu mayoria den pueblo a rechaza esaki y no a page.
SERLIMAR ta un compania di pueblo y hopi tata/mamanan di famia ta gana nan pan eynan cual ta nifica cu keda sin paga tambe ta trece consecuencia cune. Den cuadro di esaki Fraccion di MEP lo entrega den e segunda tanda di tratamento di presupuesto 2016 un mocion cu ta inclui dos peticion 1) pa baha e cobransa pa e servicio di recohe sushi di 25.25 pa 10 florin pa luna. Automaticamente e efecto cu esaki lo tin ta uno positivo pasobra SERLIMAR lo bai haya hopi mas cliente ta paga pa e servicio y placa lo drenta mas liher pa por cubri gastonan operacional y salario di empleadonan 2) den e mocion aki tambe nos di MEP ta pidi pa exonera (dispensa) gruponan mas vulnerabel den nos comunidad (entre otro nos pensionadonan y esnan cu menos recurso) di paga pa e servicio aki teniendo na cuenta cu ya caba nan tin un entrada limita.
Nos ta convenci cu e argumentonan cu a wordo treci padilanti ta di peso y lo significa un "win-win situation "pa tanto SERLIMAR y nos pueblo en general cu ya caba ta victima di hopi medida inhusto. Nos no kier pretende cu tur cos mester ta por nada pero tampoco ta husto cu Gabinete Eman ta castiga e cuidadano tur ora cu yen tipo di medida y cobransa. Nos ta spera cu fraccion di AVP pone man na curason y vota na fabor di e mocion aki cu lo trece alivio pa pueblo. Ta bon pa pueblo sa cu varios mocion na bienestar di pueblo lo wordo entrega y ta keda na fraccion di AVP pa demostra sea ta keda castiga pueblo cu medida of ta duna pueblo un alivio. "Actions speak louder than words" esaki kiermeen cu nan votacion lo ta crucial pa pueblo saca un conclusion.

Expresionnan haci den e articulo aki no necesariamente ta refleha opinion di ArenaPoliti.co