Minister Bermudez: “Duaneronan lo ricibi mas training, renobacion di ekipo y armamento den 2016”
![160131 Bermudez](/images/2016-Q1/160131-Bermudez.jpg)
Durante dia internacional di aduana.
ORANJESTAD - Diamars henter cuerpo di aduana a celebra dia internacional di Aduana y Minister di Finanzas, Angel Bermudez tambe a uni na e celebracion. Pastor Jairo Maduro a duna un bunita santo sacrificio di misa na Dakota pa e ocasion special aki y asina inicia e dia festivo entre duaneronan, ex-duaneronan y tambe e mandatario.
E aña aki e organisacion mundial di aduana a pone enfasis riba e necesidad di promove digitalisacion di e procesonan di aduana, pues e slogan pa e aña aki ta "Digital Customs: Progressive Engagement." Segun Minister Bermudez, tin plannan grandi pa Departamento di Aduana den e añanan venidero, entre nan, un edificio nobo cu henter e cuerpo ta den espera di dje pa algun tempo caba.
Ademas, ta sigui amplia riba renobacion di ekiponan necesario, experticio di e coleganan mediante training, armamento y facilidadnan di trabao na waf y aeropuerto. Finalmente den curso di 2016 tambe ta trece un concepto nobo di ley di aduana pa reemplaza esun di 1908. Di e forma aki e mandatario lo percura pa facilita cuerpo di aduana cu tur lo necesario pa nan por ofrece un debido servicio na nos comunidad y na mes momento genera optimalmente entradanan pa caha di Gobierno.
Durante e celebracion aki Sharina Hernandez di SADA, tambe a manifesta cu desde cu Minister Bermudez a asumi e cargo di Minister di Finanzas, tanto e miembronan di e sindicato como e coleganan duanero a mira y experiencia basta adelanto pa loke ta trata nan peticionnan y necesidadnan laboral, pues a pesar cu ainda tin varios proyecto pendiente, e departamento aki ta satisfecho con tur cos ta canando te cu awor.
Minister Bermudez ta felicita henter e cuerpo di aduana riba nan dia y ta gradici tur duanero pa e bon trabou desplega durante henter aña pero tambe pa nan pasenshi durante e ultimo añanan mientras e adelantonan ta tuma luga. "E departamento aki ta sumamente importante p'ami, pero sigur tambe pa Gobierno den su totalidad, nan a warda basta tempo caba pa nan por labora den e mihor condicionnan posibel y cu e mihor ekiponan, pues mi ta hopi satisfecho cu poco poco nos como dunado di trabou ta logrando subi e nivel di nos cuerpo duanero den tur aspecto", Minister Bermudez a expresa.
Expresionnan haci den e articulo aki no necesariamente ta refleha opinion di ArenaPoliti.co