“Di dia cu mi a drenta politica na 2009, mi tabata boga pa instala camera di seguridad.”  

ORANJESTAD – Parlamento a trata e ley di camera di seguridad pa duna polis mas autoridad pa combati criminalidad. Un proposicion cu lider di MEP Evelyn Wever-Croes a lansa desde 2009 tempo el’a drenta politica. Partido MEP a bai di acuerdo cu e ley aki, apesar di tabata tin palabranan hopi critico contra e maneho di Minister Dowers. “Nos no tin confiansa den minister Dowers su maneho, pero nos a aproba e ley, pasobra e ley ta duna autoridad na Polis pa actua contra criminalidad, no na minister Dowers”, lider di MEP a declara.

MEP NO TIN CONFIANSA DEN MINISTER DOWERS
Durante e reunion lider di MEP tabata bastante fuerte den su discurso. “E problema di criminalidad na Aruba ta mas serio cu nunca. E cifranan cu a wordo divulga recientemente ta mustra esey, y tur hende ta sinti su mes menos sigur na Aruba. Nos posicion ta hopi cla riba esaki: e minister actual a purba tur cos caba, y e no a logra. E departamentonan cu ta resorta bou di e ministerio di husticia ta hasi nan maximo esfuerso, e problema no ta serca nan. E problema ta na e minister cu honestamente no por maneha e cartera aki. Pesey MEP a vocifera na mas di un ocasion cu Aruba mester haya un minister di husticia nobo, uno cu ta dispuesto pa bringa criminalidad cu man duro. Ademas minister Dowers a viola nos Constitucion door di nenga di contesta preguntanan di parlamento y cu esey ta bira e prome minister di husticia cu ta viola e ley mas importante di nos pais. E minister aki no tin nos confiansa mas, y pesey mi no ta dirigi mi na dje mas, y mi no ta hasi’e ningun pregunta mas tampoco. E ley di camera di seguridad ta un ehempel. 6 anja a tarda e minister aki pa presenta e ley aki di apenas 3 articulo. Di tempo mi a drenta den politica na mei 2009, mi ta boga pa instala cameranan di seguridad den ‘hot zones’ pa preveni criminalidad. Un tema pues cu tin consensus di henter parlamento pa 6 anja. Pero ni asina e minister aki no a demostra interes ni determinacion pa percura pa e ley aki yega parlamento mas liher. Cuanto problema y sufrimento nos por a scapa den nos pais, si e cameranan aki a wordo instala algun anja pasa caba?

PRIVACIDAD DI CUIDADANO MESTER WORDO GARANTISA
E minister a tarda 6 anja y ainda e no a regla e asunto bon, pasobra e no a tene debido cuenta cu e aspecto di privacidad. Pesey nos a sostene e mocion pa instrui e minister pa regla e derechonan di privacidad di ciudadanonan, pasobra nos kier supervision, pero no pa bai biba bida di hende.

PROBLEMANAN DI NOS PAIS TA SERIO
Lider di MEP a finalisa bisando cu e problemanan di nos pais ta serio, pero e solucionnan no ta dificil. Nos por surpasa nos problemanan, basta nos tin un vision con pa hasi Aruba mas sigur, determinacion pa logra esaki y curashi pa caba cu abuso. Minister Dowers no por esaki, pero MEP si por.

Expresionnan haci den e articulo aki no necesariamente ta refleha opinion di ArenaPoliti.co