“Mester cuminsa segura nos costanan, y despues pone orden paden den nos pais.” 

ORANJESTAD – Parlamento diahuebs ultimo a trata e ley di camera di seguridad. Partido MEP, apesar di tabata hopi critico riba e maneho di minister Dowers a bai di acuerdo cu e ley aki, pasobra e ley ta duna autoridad na Polis pa actua contra criminalidad, y no na minister Dowers. Ademas ta trata di un proposicion cu lider di MEP Evelyn Wever-Croes a lansa desde 2009 tempo el’a drenta politica. MEP no tin confiansa mas den minister Dowers, pero tin pleno confiansa den Cuerpo Policial, y pesey a aproba e autoridad adicional aki pa Polis.

PROBLEMANAN SERIO DI NOS PAIS
Lider di MEP Evelyn Wever-Croes a indica un biaha mas cu e problemanan di nos pais ta serio, pero e solucionnan no ta dificil. Nos por surpasa e problemanan, pero nos mester tin un vision bon cla con pa hasi Aruba mas sigur pa tur cuidadano. Nos mester tin determinacion pa actua cu man duro contra criminalnan, y prepara e leynan necesario cu prioridad. Y finalmente nos mester tin curashi pa caba cu abuso. “Mi ta conbensi cu si nos pone un vision cla nos dilanti, nos mustra determinacion y curashi pa combati criminalidad, nos lo logra, pero no cu e gobierno aki, y sigur no cu Minister Dowers” segun lider di MEP.

SOLUCIONNAN DI MEP
Lider di MEP Evelyn Wever-Croes a presenta algun solucion cu MEP ta boga p’e, cu ta demostra e vision, determinacion y curashi. MEP ta propone un plan cu dos paso.
“Paso 1: Nos mester cuminsa cu segura nos costanan pa stop importacion ilegal di hende, arma y droga. Pasobra tanten cu nos no segura nos costanan, nos no por pone orden paden den cas. Con nos ta hasi nos costanan mas sigur? Bin bek cu e radarnan, of manera mi colega Besaril a propone, usa drones pa vigila e costa manera e radanan chikito tabata funciona. Bin bek cu e helicopter, pasobra awor ora un preso hui, no tin ni helicopter pa buske. Regla e posicion di Warda Nos Costa, duna nan e autoridad y especialmente material pa nan por traha, pa asina nos por controla nos costanan mihor y segura nan.
Una bes paso 1 ta implementa, nos por cuminsa traha na paso 2: pone orden paden den cas. Combati criminalidad cu man duro, sino criminalnan ta tuma over. Nos mester mas polis riba caya, y mester duna departamentonan di husticia material pa nan funciona. Pasobra e forma con empleadonan di KIA, KPA, Imigracion, CEA, Warda Nos Costa, Brandweer mester eherse nan trabou, ta bergonsoso, y no ta digno di un pais cu ta pretende di ta 5 strea. Hues a bolbe bati mahos riba dede di minister di husticia riba e situacion deplorable na KIA. E minister mes ta keto keto riba esaki.Pa trese mas seguridad y trankilidad den e area turistico, mester introdusi ‘tourism police’ specialisa pa opera na un forma cu no ta intimida turista, pero manteniendo orden den area turistico. Esakinan ta apenas algun di nos plannan pa trese bek e seguridad den nos pais. Cu e vision aki, y cu e determinacion y curashi cu MEP semper a demostra pa combati criminalidad, nos lo logra sigur” lider di MEP a finalisa bisando.

Expresionnan haci den e articulo aki no necesariamente ta refleha opinion di ArenaPoliti.co