ORANJESTAD – Despues di a realisa e apertura di mini cancha di futbol y parke na Madiki y anuncia cu pronto lo cuminsa construi acera y verkeerdrempels den e bario, pa e titular di Infrastructura ta importante pa tur hende sa cu e trabou no a caba aki. Den su palabranan na e ceremonia di diahuebs ultimo, Minister Benny Sevinger a bisa cu Gabinete Mike Eman II ta continua trece facilidadnan di recreacion na otro skinan di Aruba y e siguiente proyectonan di mini veldnan lo ta na Cura Cabai, Bubali y tambe Dakota. “Esaki ta importante pa e desaroyo di e bario,” e mandatario a bisa. “Nos ta traha hunto cu e barionan pa trece solucion.”

Ademas di Minister Sevinger, coleganan di Husticia y Salud tabata presente. Ministernan Dowers y Schwengle a papia di e trabou den ekipo cu ta tuma luga den Conseho di Minister ora cu Prome Minister Mike Eman ta trece e iniciativanan aki pa dilanti. Ideanan manera di e mini cancha di futbol ta haya sosten di Ministerio pa loke ta trata trabounan publico, facilidadnan di deporte, finanzas y tambe siguridad. “Sin duda e proyecto aki lo mehora e calidad di bida di e bario. Ademas di Polis den Bario muchanan lo ta menos riba caya y mas riba veld haciendo cosnan saludabel,” asina Minister Sevinger a declara.

Tabata particularmente un momento special mirando cu e ceremonia di apertura a conta cu presencia di algun di e grandinan di futbol cu na organisacionnan manera Riverplate, Aruba Juniors y RCA. Na opinion di e Minister, e hendenan aki a duna nan contribucion pa generacionnan por a haci deporte y ta spera cu por tin mas ciudadano asina cu ta contribui na nos bario y na nos pais. Adicionalmente MInister Sevinger a felicita Premier Mike Eman pa su empeño den ehecuta proyectonan den bario cu ayudo di INFRA-Team, FCCA y su propio Ministerio, entre otro. Tambe tabatin un palabra di pabien pa contratista pa e excelente trabou haci.

“Tur esnan envolvi a haci un bon trabou. Mas nos traha, mas nos hobennan ta bay haci uzo di dje; mas nos ta bay contribui na siguridad, na deporte y na un miho sociedad sano pa nos pais,” asina Minister Sevinger a finalisa bisando, pero na mesun momento pidiendo un y tur den bario pa haci bon uzo di e veld aki, cuid’e ya cu e ta un inversion di nan propio placa y a wordo haci cu hopi sodo. Su deseo ta di por mira hobennan di tur edad haci uzo di dje y grandinan tambe bin sinta combersa, wak e bida rond di dje y trece ambiente na e facilidad.

Expresionnan haci den e articulo aki no necesariamente ta refleha opinion di ArenaPoliti.co