Si bo puntra cualkier hoben, cua di nan a yega di haya oido cerca of un oportunidad for di un gobernante of parlamentario, e mayoria lo bisa nunca. Pa e poco cu por bisa si, ta pasobra nan a bira un persona importante cu e gobernante of parlamentario por uza pa drecha nan imagen politico. Tristo pa mira ora un hoben bira famoso internacional, diripiente e ta bira un ‘somebody’ pa e gobernante y parlamentario. Tur e tempo prome ora e tabata tin mester di nan ayudo, e tabata un ‘nobody’. Un bon ehempel di esaki ta e peloteronan cu a yega di of ainda ta hunga na Merca. Tur nos peloteronan exitoso, a yega unda nan ta den bida cu hopi lucha, sacrificio di añanan largo, sosten di nan famia y sin ayudo di cualkier gobernante of parlamentario. Di esakinan, solamente esunnan mas fortuna, por termina riba e ‘payroll’ di gobierno, sin cu ningun hende sa precies kico ta nan trabou. Pero pa e mayoria di e hobennan, no tin nada y tampoco lo haya algo.

Nunca gobierno a bin cu un proyecto bon, structura y structural unda realmente ta wordo inverti den e hoben. Un proyecto unda e hoben por desaroya su mes y su talento, pa asina e por progresa den bida. Unda e amor di nos gobernantenan y parlamentarionan a keda pa mantene nos hobennan ocupa cu cosnan creativo y positivo? Con abo, ami y nos tur por yega leu den bida, si no tin mucho proyecto of facilidadnan deportivo disponibel unda nos por desaroya y progresa.

Pa esaki tin un logico su tras: 'ki mishi un gobernante of parlamentario crea un proyecto pa motiva y yuda e hoben progresa'. Si bo keda sin duna un hende cuminda e ta muri. Wel mescos ta conta pa e hoben. Si bo no duna e hoben loke e merece, e ta kibra. Porta ora e gobernante of parlamentario tabata hoben, nunca nan tabata miembro di un club deportivo of a pensa cu esaki ta necesario pa yuda nan progresa den bida. Kisas nan a wordo ‘geblind’ door di esunnan cu tabata na mando e tempo ey. Porta p’esey nan no ta mira e importancia di esaki? Nan kier nos hobennan pasa den locual nan a pasa aden? Ningun di nos hobennan no kier bisti e mesun sapato di antes, nos tur kier algo nobo, cosnan nobo, pa nos tur por bay pa dilanti.

E prome cos cu hopi mayor ta pensa pa laga nan yiu haci despues di scol, ta deporte. Pero parce cu nos gobernantenan y parlamentarionan a lubida of no kier wak mes kico ta e necesidadnan di e hobennan di clase medio of abou di e sociedad. Esaki ta e consecuencia di tur a bira mientrastanto miyonario cu nan no sa mes kico ta e necesidadnan di e hoben comun, pasobra nan si por paga diferente instancia pa cuida nan yiu pa nan. Nos tur ta igual y merece un partido cu tin e pueblo na curason. Un partido cu lo traha pa tur hende y no pa su mes. Un partido cu lo traha den un forma husto unda tur hende tin e mesun oportunidad pa desaroya su mes den un forma sano. Un partido cu si lo scucha loke e hoben tin di bisa. Esey ta partido ABO!


(www.aboaruba.org, This email address is being protected from spambots. You need JavaScript enabled to view it.)

Expresionnan haci den e articulo aki no necesariamente ta refleha opinion di ArenaPoliti.co