Conseho Fiscal ta busca pa establece guia y disciplina den e desaroyo economico y social

ORANJESTAD – Durante e apertura di encuentronan inicia ayera pa un Conseho Fiscal di Aruba, Mr. Hassanali Mehran tabata e persona invita pa duna e comentario inaugural. Un figura masha respeta na Aruba y na nivel internacional, e experto den economia, a reflexiona Aruba riba e situacion y retonan cu Aruba tin su dilanti. E ta kere den e creacion di un entidad autonomo cu e funcion pa guia e metanan financiero di pais nos pais. Tambe el a elogia e iniciativa di Gabinete Mike Eman pa introduccion di un plataforma manera ta Dialogo Social.

Bintincinco aña despues di su prome biahe di trabou pa nos isla, Mehran ta bolbe forma parti di momentonan importante, un luho cu segun Prome Minister Mike Eman a indica, poco por tin. Manera ta conoci, Mehran tabata President di Banco Central di Aruba, como tambe di Aruba Investment Bank den pasado. Ta logico pa e forma parti di e delegacion di Fondo Monetario Internacional cu Aruba a invita pa sinta hunto cu Banco Central y Minister di Finanzas y Organisacion Gubernamental, pa señala e structura y reglanan pa formacion di un Conseho Fiscal.

Den su remarkenan, Mehran a recorda con 29 aña pasa el a bin den un mision pa evalua si Aruba mester a institui su mesun Banco Central of keda afilia na esun di Antias. Como un advertencia di e tenacidad di e pueblo Arubiano, el a menciona cu Gobierno e tempo ey a bay contra e recomendacion di IMF pa sigui forma un union monetario hunto cu e otro islanan den Reino. “Cu 27% di desempleo, ciere di refineria, tabata momentonan di retonan grandi cu Aruba a afronta bou liderazgo di Henny Eman,” asina e experto a indica na e sala. For di e tempo ey, IMF a participa den e desaroyo di Aruba y e meta cu a pone pa su mes.

Danki na e cooperacion di e personal y recursonan di Banco Central di Aruba, Mr. Mehran a tuma tempo pa analisa tur loke a pasa den e ultimo 29 aña di Status Aparte riba nivel fiscal y monetario. Pais Aruba a conoce 21 aña cu deficit y 7 cu surplus. “Bo no mester ta un matematico cu poder halto pa sa cu tin tres variabel basico den e banda fiscal... Bo tin e total di entrada di Gobierno, e total di gasto di Gobierno y despues bo tin e debe nacional. Si e entrada no ta den liña cu e gasto, bo ta mara na tin un debe creciente,” asina Mr. Mehran a bisa, splicando cu e crecemento promedio di debe pa aña ta di 17%.

Consecuentemente Mr. Mehran a bay over na bisa cu e vision di Prome Minister y su Gabinete por wordo reconcilia cu algun poco regla fiscal specifico. “Ta djis natural cu representantenan di pueblo a eligi nan pa ehecuta programanan social. Si nos ta bay logra un presupuesto balansa, mester tin un caminda pa hiba nos eynan,” tabata su palabranan. Un entidad autonomo lo percura esey, duna nos e advertencianan y asina por tuma e accion corectivo. Adicionalmente mester revisa e constitucion di Aruba pa mara e determinacionnan legalmente. Tambe mester bay wak mas aleu riba un sistema di monitoreo.

“E no ta nifica cu Gobierno ta delegando su responsabilidad; e ta un asunto di representacion y democracia. Ta mi opinion cu nos por mantene e autonomia y integridad di loke a cuminsa na 1986 y adheri na cierto reglanan pasobra momento a yega, cu pa por sostene nos desaroyo y guia social y metanan riba termino largo, mester mantene cierto disciplina den e futuro inmediato,” Mr. Mehran a bisa di un manera masha cla. El a finalisa su turno gradiciendo pa e invitacion pa forma parti di e proceso aki y confirmando su compromiso pa yuda bin cu e solucionnan necesario pa e aspiracionnan di Aruba.

Expresionnan haci den e articulo aki no necesariamente ta refleha opinion di ArenaPoliti.co