ORANJESTAD - Diahuebs mainta den Renaissance Convention Center, varios invitado manera representantenan di Parlamento, Camara di Comercio (KvK), Aruba Trade & Industry Association (ATIA) y representantenan di sindicato  tabata presente na e seminario organisa pa Ministerio di Finanzas hunto cu Banco Central di Aruba y Fondo Monetario Internacional (IMF), tocante e proceso pa implementa un conseho fiscal na Aruba.

Durante diahuebs mainta a cuminsa cu e parti introductorio, sigui pa un parti mas tecnico mediante ‘workshop’ unda cu e specialistanan di IMF a comparti nan conocemento y experiencia tocante un ‘Fiscal Counsel’.  Ta trata aki di un fenomeno cu ta existi den 30 pais rond mundo y cu awendia mas pais ta busca pa implement’e pa motibo di e crisis global.

E conseho fiscal aki ta un organo independiente cu tin un papel special pa supervisa, conseha y recomenda riba e desaroyonan di presupuesto di cada pais. Den tur e paisnan cu ta conta cu un conseho fiscal den actualidad no tin dos modelo mesun cos, pues esaki ta depende di varios factornan manera, economia, forma di Gobierno y comunidad entre otro.

Segun Minister Bermudez debi cu no ta existi un modelo cu por wordo copia y introduci pa haci e seminario cu IMF na Aruba y trece cierto discusionnan padilanti. “Pa medio di un dialogo nacional den e tempo venidero, nos tin cu bay discuti cu otro y hunto cu e expertonan varios aspecto manera e normanan cu nos lo establece, e reglamentonan, e tipo di autoridad di e organo aki, pues e no ta un proceso facil y sigur e lo tuma su debido tempo pa wordo implementa y ancra den nos leynan”, asina e mandatario a informa.

Na mes momento Minister Bermudez a confirma cu ya pa algun aña caba e idea a wordo planta y na momento cu a mandatario a bay Washington pa e reunion anual di Banco Mundial y IMF e organisacion di e seminario aki ya a cuminsa  basa riba conversacionnan cu tabata tin aña pasa y dos aña pasa cu Gobierno di Aruba.

E mandatario di finanzas ta sigur esaki ta e momento oportuno pa cuminsa cu e discusionnan necesario durante e seminario aki pero mester percura pa su continuidad. “Lo cual a tuma luga den e ultimo dos dianan aki ta un parti di un discusion lago, pero nos a inclui den nos presupuesto 2015 cu otro aña nos lo institui legalmente un conseho fiscal pa Aruba y ora nos ta asina leu mi ta spera cu nos lo tin un bista caba riba e definicionnan di su organisacion, su structura, su autoridad cu normanan y cu asina ey entrante 2016 cu e por funciona debidamente.” Minister di Finanzas a indica.

Finalmente e mandatario a expresa cu esaki lo ta un cambio basta drastico pa futuro pero e ta uno necesario pasobra e crisis mundial ta indica cu e tarea pa mantene un disciplina presupuestario den actualidad ta dificil. E mandatario ta sigui splica cu ta existi diferente teoria pa sali for di un crisis economico, pues  mester por yega na un organo por conseha riba esey. “Manera e expertonan a splica, na cierto momento ora tin un bonanza economico,  bo no ta gasta tur e entradanan cu tin pero mester crea reserva pa nos por steun riba dje. Eseynan ta aspectonan cu bo por bisa cu nos na Aruba no conoce awe ainda den nos sistema di finanzas publico pero cu si lo forma parti di nos sistema di finanzas publico den futuro”.

Expresionnan haci den e articulo aki no necesariamente ta refleha opinion di ArenaPoliti.co