Kico mas tin di bisa di nos isla? One Happy Island e NO ta! E supuesto fama di “isla sigur” tampoco NO ta vigente mas. Kico mas tin di pasa riba e pida baranca aki pa esunnan cu ta carga responsabilidad pa e pueblo aki, esunnan cu pueblo a vota pa forma gobierno, tuma consenshi y actua? Bo no por laga e luga sigui drif manera un barco sin rumbo anto kere cu, cu palabra fofo, bo ta resolve problema.

For di hopi tempo atras Chichi a mira e loke ta tuma luga den comunidad, esta aumento di criminalidad, ta bini. Awo e ta abiertamente, publicamente, un hecho. Tur gobierno cu a sinta a neglisha criminalidad y hasta por bisa cu nan a contribui na su aumento. A kere cu dor di djis ignora, e lo disparce di su mes. E politica di avestruz ey ta e causa cu nos a yega unda nos ta awe.

Unda polis riba caya a keda? No, no den auto. Cana na pia manera antes, tempo cu Chichi tabata mucha. E presencia visibel sigur ta haci un diferencia. Con por ta cu un evento, manera esun cu a tuma luga diasabra, no tabata tin polis ta controla prome, durante y despues? Atrobe, e negligencia aki a contribui na loke a pasa cu e hoben atleta.

Ademas, polis mester cana stret; ley ta pa un y tur. Chichi kier sa ta di con a laga e abogado cu a “hit & run” liber? Mas ainda ora cu visibelmente e tabata burachi y riba dje a NENGA di supla??? Ay si tabata Buchi, nan lo a hib’ e cera sin misericordia. Respeta y aplica ley sin mira ta ken. Ta con bo kier pa nan respeta bo?!

Chichi keto bay no ta kere cu e refineria lo habri. E ta mustra di ta otro fracaso mas. Di con no ta duna detaye di kico ta pasando? Reunion ta bay y bin, pero esey no ta garantia di nada. Talbes otro siman por haya sa kico ta kico.

Minister Paul Croes ta bisti un bril ros y ta kere cu tur hende mester wak tur cos “color de rosa”. Pa minister Croes e Expo Labor tabata un exito. Ki sorto di exito? Paso cu el a wordo bishita pa un grupo grandi di hende? Y kico a wordo ofreci? Nada!

Den concepto di Chichi, Expo Labor a mustra hopi cla con desespera e comunidad ta pa haya trabou. E informacion cu tabata disponibel tabata masha pober y claramente e expo aki a mustra e falta di diversificacion cu ta necesario pa mas hende haya trabou. Anto esey no por wordo yama “exito”.

No ta di awo abuso sexual di mucha ta tuma luga den e comunidad aki. Kibra silencio no ta tur cos. Mester actua y mester actua di parti di instancianan gubernamental. Chichi ta kere cu mester cambia e sistema cu, pa motibo cu e NO ta sirbi, ta mantene stigmatisacion riba e muchanan abusa y asina ta sigui crea mas victima.

E ta remarcabel cu tur luna turismo ta bay bon na Aruba, asina bon cos ta bay cu casi e ta “sospechoso”. Awo cu Cuba a habri porta, yen di hende tin miedo cu turismo pa Aruba lo cay. Chichi ta haya cu esey ta co’i loco; loke por tira y lo tira nos turismo abou ta e cantidad halto di criminalidad, fraude, ladronicia, atraco, gañamento etc. cu tur santo dia ta tuma luga den nos comunidad. Ta nos mes ta kibra nos luga, ningun otro pais!

Ta increibel cu no por controla loke ta pasa riba e isla aki unda apenas tin 120 mil persona ta biba. Ta increibel cu, sabiendo unda ilegalnan ta drenta, no por evita esaki. Ta increibel cu bisando cu e isla aki ta pata pata di arma, no ta haci nada contra esaki. No tin control ningun caminda y gobernantenan ta haci loke nan kier. Chichi ta kere cu Pueblo no mester  lubida cu ta e ta esun cu ta manda y no minister ni parlamentario!


(www.aboaruba.org, This email address is being protected from spambots. You need JavaScript enabled to view it.)

Expresionnan haci den e articulo aki no necesariamente ta refleha opinion di ArenaPoliti.co