Contrario na tur locual cu e exponentenan di AVP, parlamentarionan di AVP y Ministernan Paul Croes y Schwengle ta bisa, MEP a bay na fabor di e amienda cu SVB a traha pa Fraccion di AVP den cual entre otro ta hisa e suma di cesantia. Prueba di esaki ta compania e articulo aki. Lamentabel ta cu AVP y sigur Ministernan Croes y Schwengle a bolbe demostra cu nan ta gañando e Pueblo djies pa probecho politico y no tin e hombresa of e sinceridad pa por declara e berdad cu MEP a sostene e subida di cesantia pa asina por yuda tur hende cu ta perde trabou incluso e trahadornan di Aura Casino.

Amienda traha pa SVB
Manera cu nos a informa poco dia pasa, e cambionan di e Ley di SVB ta puramente dirigi pa legalisa e ‘triki’ financiero pa libra Gobierno di paga 60 miyon na e fondo di SVB. Pa lombra wowo di Pueblo a core hinca facetanan positivo den e ley y pesey na ultimo ora Fraccion di AVP a presenta un amienda, cu porcierto a wordo traha pa e profesionalnan di SVB, pa asina desvia atencion di e ‘triki’ aki y evita cu opocicion bay contra pa legalisa e ‘triki.’ Nos di Fraccion di MEP a sostene e amienda pa asina por hisa e suma di cesantia, ya cu ela wordo traha pa SVB cual ta sigura cu su ehecucion den practica lo bay bon y banda di esaki nos a sostene e amienda ya cu e ta yuda tur esnan cu ta perdiendo nan trabou, incluso e trahadornan di Aura Casino.

Paul a laga trahadornan di Aura na caya
E ta un berdadero berguensa pa mira con Minister Paul Croes ta haci politikeria cu e dolor di e trahadornan di Aura Casino. Pasobra e mandatario NO a yuda nan pa nan por a cobra nan salario atrasa. E motibo ta obvio, ora cu e ta goza na hotel y den ballroom cu ki cara of autoridad moral e por bay defende e trahadornan dilanti nan donio di trabou??? Pero awor cu SVB a traha e amienda aki, Minister Paul Croes a wante cu dos man ya cu e por bay gaña cu ela yuda cu placa di cesantia, siendo cu e trahadoran tabata tin derecho caba riba pago di censantia. Cu e amienda di SVB ta subi e suma no ta un logro di Minister PauL Croes, pero mas bien e ta un muestra cu Paul a laga e trahadornan di Aura Casino na caya y awor ta djies haci politikeria cu nan dolor.

Nos ta contra pa legalisa ‘triki’
For di ora cu Gabinete Eman a presenta e cambionan di Ley di SVB pa por legalisa e ‘triki’ financiero den cual Gobierno ta libra su mes di un debe na e fondo di SVB pa asina por mustra cifranan mas bunita na CFT, nos Fraccion di MEP a bisa cu nos no lo duna sosten na e tipo di ‘trikinan’ aki cu na fin di dia ta sali nos Pais caro. Nos a premira cu AVP lo bin cu e wega conoci di bin hinca cosnan positivo den e ley pa asina evita opocicion di vota contra y pesey nos a splica Pueblo e wega aki adelanta y a adverti pa no cay den e trampa aki. Pero awe e votacion riba e amienda ta comproba cu e djacanan di AVP a cay den nan mesun trampa.


4 mei 2016

Expresionnan haci den e articulo aki no necesariamente ta refleha opinion di ArenaPoliti.co