Siman pasa parlamento di Aruba a trata e ley pa aumenta e premieloongrens te na 70.000 florin. E cambio aki ta nada mas y nada menos cu un medida mas. E biaha aki comercio lo mester contribui mas na e fondo di malesa. Ningun comerciante ta bai carga e peso addicional aki sino mas bien nan lo bereken esaki door na pueblo. Svb lo bai ricibi mas entrada pero e pueblo tin cu bolbe wordo sacrifica. Tin biaha nos tin cu puntra nis mes si di berdad Svb ta den necesidad di placa mirando con nan a regala gobierno 60 miyon florin. Svb a caba di duna gobierno un ‘’kwijtschelding’’ di 60 miyon florin na gobierno pa yuda nan cumpli cu CFT.

Remarcabel tawata e amienda cu a wordo presenta pa fraccion di AVP referente cessantia cu awe nan kier hunga wega politico cune. Pa nos ta hopi cla den esaki, fraccion di MEP a sostene e amienda aki y no manera ta wordo bisa door di AVP.

Loke si nos ta lamenta ta e hecho con Paul Croes kier hunga politica masha barata cu e cambio di e ley aki, haciendo comosifuera esaki tawata e solucion pa e trahadornan cu a perde nan trabou na aura Casino. E gran culpabel y responsabel pa con a maneha e asunto di e trahadornan di Aura Casino ta netamente Paul Croes. E ta esun culpable y responsabel pa tur esnan cu a perde trabou na Aura Casino. Na momento cu e casino a sera su portanan Paul Croes mester a manda un mensahe cla pa e donjonan di hotel cu tin e hotel- en casino vergunning. Sea nan ta paga e trahadornan locual nan tin cu wordo paga of nan lo perde nan licensia pa opera casino na Aruba. Logicamente Paul Croes no a haci esaki pasobra ta trata di su ‘’amigonan’’. Ta cu ki cara e ta bai menaza su amigonan di kita vergunning for di nan? Ta un berguenza awor cu Paul Croes kier usa Svb como solucion mirando cu Svb lo bai paga cessantia na trahadornan despues cu nan a keda mas cu 4 luna sin salario. Cessantia no ta un solucion di gobierno, cessantia kiermen tur trahador a perde nan trabou.

Paul Croes mester stop di hunga cu inteligencia di nos pueblo pasobra e trahadornan ta bon na altura con nan a wordo maltrata door di gobierno. E trahadornan aki a keda 4 luna sin cobra salario, nan  pasa pasco, anja nobo y henter e anja aki bashi. Ta tristo pa despues di tur e lunanan aki bin tende cu e unico solucion cu gobierno por a duna e trahadornan ta di cobra cessantia. Esaki no ta ningun solucion sino mas bien un derecho di cada trahador. Te awe nos no por caba di compronde con gobierno a laga e hotel cu su casino vergunning y a bai di acuerdo si pa retira 44 mama y tata di famia for di trabou. E pregunta cu mester haci na minister di labor ta, na ken su band abo ta para??? Bo ta para nan banda di e mama y tatanan di famia cu a perde trabou of bo ta para na banda di e hotel?? Tin tur indicacion y e hechosnan di Paul Croes ta demostra cu e la laga tur e trahadornan na caya, e la bira lomba pa nan y mas bien ta para na banda di e hotel. E so sa pakiko e la laga e trahadornan cai manera un patia berde. Ta un lastima cu un hoben asina ta tuma decisionan pa perhudica trahadornan envez di yuda trahadornan. Awor tur hende por wak kende realmente ta para na banda di e trahadornan. En todo caso Paul Croes cu su hechosnan a demostra cu e si NO ta para pa yuda trahadornan cu ta den problema!

Expresionnan haci den e articulo aki no necesariamente ta refleha opinion di ArenaPoliti.co