Alvin Koolman, experto den refinacion cu amplio experiencia, lider tecnico di e team negociador di Citgo 

ORANJESTAD- Sr. Alvin Koolman ta un di e miembronan di e team cu a negosha pa un temporada basta largo pa yega na un acuerdo cu Citgo Petroleum Corporation riba re-apertura di e compleho petrolero na Sero Colorado. Sr. Koolman tin un experiencia grandi y experticio amplio riba tereno di refineria. Basa riba e conocimento aki Minister di Energia Mike de Meza a pidi sr. Koolman pa forma parti como lider di e 'team tecnico' cu el a trece hunto pa yud'e den e negosacionnan intenso den caso di re-apertura di Valero. Alvin Koolman a traha den industria petrolero caba for di tempo di Lago Oil and Transport Company. Ora esaki a cera el a bay Corsou y a regresa su isla pa traha despues cu Coastal cu despues a bira El Paso - Valero.

Sr. Koolman a splica cu loke a yega na dje diabierna 13 di mei ta un areglo. "Awor nos ta bay pone tur loke a yega na dje den e areglo pa wordo realisa prome cu 1 di augustus y tambe pa despues di e fecha aki. Awor e trabounan mes a cuminsa y nan ta hopi hopi mes. E punto principal ta cu pais Aruba a bira doño di e facilidad. Esaki ta nifica cu Valero ta traspase pa pais Aruba cu na su turno ta pone den un compania estatal cu ta huur e cu Citgo Petroleum Corporation. "

"Den un caso di traspaso asina bo mester percura pa no haya bo mes cu responsabilidadnan of liabilities cu gastonan exorbitante", Koolman a splica. "Esaki tabata e proceso principal. Percura pa cada asunto aki ta bon negosha. Tabatin masha hopi detaye cu mester a tene cuenta cu nan." Koolman a conta cu ta facil pa bisa cu bo - den e caso aki Valero - tin zero liability, pero cu esaki no ta algo cu ta bay sin mas. "Asina tin e punto di limpiesa. Ken ta bay paga pa esey? Nos a negocia esaki cu Valero y cu Citgo tambe ora tuma over e facilidad."

Aruba a conoce tres otro refineria riba e tereno na Sero Colorado. Sr. Koolman a traha cu nan tur. Den corto el a splica kico ta e diferencia entre e dealnan cera cu nan y Citgo awe. "Cada un di e companianan prome semper a opera e facilidad como un refineria. Kier men nan tabata traha productonan final manera kerosin, diesel y Lago a traha gasolin tambe. E diferencia ta cu Citgo no ta bira un refineria. Pasobra e facilidadnan cu tin den Valero no por traha e productonan specifica como refineria. Como un mehorado di crudo si e por funciona. Asina e facilidad a capta e interes di Citgo Petroleum Corporation."

Koolman a splica tambe cu Venezuela mes no ta interesa den construi un otro refineria banda di e cuatronan cu e tin caba, pasobra e pais mester partnernan grandi pa yuda den esaki y mester hopi placa. "Ora e refineria di Aruba a bira available, PdVSA a bisa Citgo cu e tin e crudo pa nan por opera e facilidad na Aruba. Nan ta duna e crudo extra pisa na Citgo cu ta refina esaki den crudo sintetico pa nan propio refineria. Esey ta e business plan di henter e concepto di Aruba."

Un otro punto aparte di placa grandi pakico Venezuela mes no a construi un otro refineria ta cu lo dura 5 pa 7 aña pa trah'e y lo a costa shete biaha mas hopi y lo a dura hopi aña tambe prome yega na e produccion maximo. Contrario na e deal cu Corsou ta cu tempo cu Shell a cera eynan e tabata paga 25 miyon na belasting. "Den añanan 70/80 tabatin un ley cu tabata bisa cu si e compania no gana placa e mester paga minimo 25 miyon na belasting. Ora cu na Aruba Lago a cera y Shell na Corsou, a bin un crisis na 1985 na e islanan. Corsou a bisa cu si Shell bend'e e planta pa un florin e lo lease e cu Venezuela. Asina Corsou a lease e refineria cu Venezuela pa 25 miyon, loke tabata e minimo cu Shell tabata paga y a percura asina pa e hendenan a keda cu trabou. E unico cos cu Corsou ta haya ta 25 miyon. E compania no ta paga belasting riba ganashi y si gana of perde placa ta e mesun 25 miyon e isla ta haya, nada extra. Esaki ta e diferencia principal di e deal entre Aruba y Corsou. Aruba tin dus un deal mucho miho."

Pa loke ta uso di LNG, for di prome dia cu e facilidad cuminsa opera, e ta haci esaki cu gas, loke ta haci'e un 'refineria berde'. Koolman a bisa cu esaki tabata un condicion masha fuerte di Prome Minister Eman. "El a pone hopi enfasis riba e punto aki desde nan a firma e MoU (Memorandum of Understanding) cu gas mester ta parti di e proyecto. Citgo no necesariamente tabata kier esaki. Pa nan e gas ta haci e operacion mas caro y nan por start mas lihe sin gas. Pero pa gobierno esaki tabata un 'non-negotiable item' y a pon'e for di un principio den su MoU. Asina ta cu e areglo a keda cu ora e facilidad start up, aki un aña y mey mas o menos, e ta start cu LNG (Liquid Natural Gas)."

Koolman a duna un splicacion tambe dicon e refineria no ta bay opera como tal, pero ta bira mas bien un mehorado di crudo. "Como un refineria nunca e tabatin un chens. Hopi a trata, pero no a logra. Tin un capacidad di 3 pa 4 miyon di bari di exceso di refinacion na mundo. Refinacion no ta ganando mucho placa. Pa bo laga e facilidad aki funciona como un refineria mester di 3 mil pa 4 mil miyon dollar (3 pa 4 biyon dollar). Pesey Valero a cer'e. E unico concepto cu e keda ta un mehorado di crudo. Bo ta inverti menos, bo no ta cambia e proceso y bo tin productonan final cu ta produci placa. Sin e concepto aki e reapertura no tabata factibel."

Expresionnan haci den e articulo aki no necesariamente ta refleha opinion di ArenaPoliti.co