MEP ta ripiti 25 preguntanan na Minister Otmar Oduber 

Dia 30 di maart ultimo Fraccion di MEP a manda un lista di 25 pregunta na minister Otmar Oduber encuanto varios actonan cuestionable cu e ta hasi cu fondo di ATA, entre otro tocante e logo, banners, radio emisora y concentracion na un solo persona/compania, amigo di minister Otmar Oduber.

Lamentablemente te dia di awe e minister no a contesta e preguntanan aki, y Fraccion di MEP a haye forsa pa manda un prome REMINDER siman pasa. Ta importante pa haya sa kiko realmente a pasa y ta pasando cu placa di e organisacion aki na man di minister Otmar Oduber. E minister ta bisa cu tin rapport di entre otro Centrale Accountants Dienst, pero e no kier duna ningun hende e rapport. Siman pasa a resulta cu pa e fondo di turismo tampoco e minister tabata tin cifras pa produci. Y tur esaki ta lanta hopi sospecha. Especialmente e pregunta: TA KI MIEDO OTMAR ODUBER TIN?

Si e minister SIGI nenga di contesta e ta forsa Fraccion di MEP pa yama un reunion publico na unda  lo bai mas den detayes y te hasta por presenta mocionnan, entre otro un Mocion di Desconfiansa, si e minister keda sin duna aclareacion y actua contra reglanan di transparencia.

‘OTMAR ODUBER TA DONJO DI RADIO NA PIEDRA PLAT’ esey ta locual un periodista a acusa e minister di dje, y na e momento ey e minister a rabia, bira onsportief y hasta a menasa pa hiba e persona en cuestion corte. Pero na final toch e no a haci tal cos, lagando como un hecho e ora cu e minister ta donjo di e radio emisora.

PANAMA PAPERS, pa locual ta e persona cu ta director di Power FM y pa cual tin duda cu e tabatin asina tanto plaka di su mes pa cumpra e radio emisora, unico cos cu a wordo bisa ta cu e placa a bin di Panama. For di investigacion hasi e persona aki no tin tanto placa pa paga pa un radio, ni tampoco tin registra di unda e tin link cu Panama. Pues e transaccion aki di compra di e radio tambe ta uno cu mester wordo cuestiona y investiga pa Banco Central

‘ATA TA BANCO DI MINISTER OTMAR ODUBER’, esey tabata otro acusacion mas di e periodista aki, cu mester sa hopi! E minister tampoco a pone e periodista rectifica e acusacion aki, hasiendo e un hecho cu e minister ta usa ATA como un banco! E minister ta bisa cu e board semper a aproba tur lokual ta pasa den ATA y cu hasta tin “goedkeurende accountants verklaring” cu ta mustra esey, pero atrobe e minister no kier mustra e accountantsverklaring ey!

MINISTER OTMAR ODUBER A RABIA Y BIRA ONSPORTIEF, pero si un persona no tin nada di sconde, e ta actua trankil y ta defende su mes sin mester bira nervioso y histerico manera Otmar Oduber a bira. Ta pesey mes pueblo tin haya sa e berdad y e minister mester contesta tur e preguntanan, pasobra  ainda tin hopi asuntonan cu e no a aclarea. 

Expresionnan haci den e articulo aki no necesariamente ta refleha opinion di ArenaPoliti.co