Elton Lioe-A-Tjam (ABO): Parlamentarionan gritando ‘Pabien’. Pero ‘Pabien’ cu kico?
Mira, informa y controla algo prome e wordo cumpra, ta algo normal pa tur hende. Pero parce cu nos parlamentarionan a lubida esaki. Den nan ansha pa haya un pida di e cabay di campaña ‘CITGO-deal’, tur fraccion, ni un exclui, a core bay felicita pueblo cu e ‘reapertura’ di e refineria, sin un dia nan a mira un documento of acuerdo. Algun hasta a confirma esaki ora nan a declara cu nan a ‘tende y scucha’ pero te ainda ‘no a mira nada’. Pues defacto nan a cumpra pa pueblo un ‘CITGO-deal’, sin cu nan sa kico nan a cumpra y pa cua prijs. Cu e postura aki, e ta obvio cu no lo tin un debate di contenido y cu tur parlamentario lo bay vota ‘voor’, e momento cu e ‘Final Agreement’ wordo trata den parlamento. Pues un otro show ‘historico y emocional’. Nos parlamentarionan a hinca pueblo den un otro aventura financiero, sin cu un dia nan a wak un documento di e ‘CITGO-deal’. Tur esaki pa haya un tiki reconocimento, cu por wordo uza despues como propaganda politico pa bende pueblo cu nan si tabata tin un rol importante den e reapertura di e refineria. Wel, wel, esaki ta e calidad di nos parlamento. Pero ‘Pabien’ cu kico?
- Pabien! Na e gobierno cu nan ta critica tur dia cu a haci Aruba bancarota. Pero asina mes nan a caba di duna gobierno un cheque blanco pa gasta algun biyon na su antoho y sin control. E prijs final cu pueblo lo bay paga pa e ‘CITGO-deal’, no ta importante. Mas importante tabata pa nos parlamentarionan haya un pida di e bolo di cabay di campaña;
- Pabien! Pasobra gobierno a viola atrobe e Constitucion, e ‘Comptabiliteitsverordening’, e ‘Settlement Agreement’ y asina tambe a ‘verkracht’ nos parlamento (pues pueblo). Pero e biaha aki, nos parlamentarionan si tabata ‘voor’;
- Pabien! Pasobra pueblo a cumpra algo, pero te aki 2-3 aña e lo haya sa kico e la cumpra;
- Pabien! Pasobra pueblo a hereda algun ‘claims’ ambiental y di desmantelacion miyonario, manera stipula den e ley ‘Settlement Agreement’, cu antes tabata di Valero;
- Pabien! Pasobra segun e ley ‘Settlement Agreement’, e refineria mester tabata di pueblo caba. Pero asina mes, pueblo lo bay paga entre 800-1200 miyon florin pa algo cu tabata di dje caba;
- Pabien! Pasobra gobierno, hunto cu e parlamentarionan ‘Pabien’, a hinca Aruba den un otro aventura biyonario, cu un tuberia di gas pa opera e refineria supuestamente ‘Green’;
- Pabien! Pasobra nan lo permiti e refineria procesa un ‘pitch’ cu hopi contaminacion, sin un ley of control ambiental;
- Pabien! Pasobra 22 miyon florin di impuesto cu gobierno lo haya pa baha e debe nacional biyonario, ta mas importante cu e salud di hende y e medio ambiente. ‘Pabien’, bon escogencia, tremendo prioridad, hopi ‘Green’, duradero y sostenibel;
- Pabien! Pasobra e ‘CITGO-deal’ lo crea entre 3000-5000 cupo di trabou, di cual mayoria di esakinan lo ta pa hende di exterior y no hende local;
- Pabien! Pasobra awor si e minister di Infrastructura lo haya un excuus valido pa duna mas tereno y cas social na e extranjero. Cu esaki lo pone mas presion riba e infrastructura y nos cultura, esey lo ta un problema pa un futuro gobierno;
- Pabien! Pasobra gobierno a logra pone un parti di pueblo lubida cu ta nan mes a causa e miseria economico. Cu gobierno a uza e mesun triki aki na 2009 y 2013 caba cu exito. Y awor gobierno a logra pone algun hende kere cu e ‘CITGO-deal’, ta e unico ‘salbacion’ pa tur Aruba su problemanan economico.
Otro cos pa pensa riba dje. E refineria ta na Aruba. E refineria lo ta propiedad di pueblo. Ta Aruba y su pueblo lo tin cu bay carga tur e gastonan y riesgonan biyonario. Anto dicon e ‘Final Agreement’ mester wordo firma den exterior? Straño, pero e ‘CITGO-deal’ ta manera un ‘deja-vu’. Algun aña pasa, Aruba mester a paga miyones, pasobra e mesun protagonista principal den e ‘CITGO-deal’ a scoge pa legislacion y hurisdiccion di un otro pais, enbes di esun di Aruba. Esaki por ta un ripiticion di e mesun triki aki, pero cu e diferencia cu awor tin biyones envolvi enbes di miyones? Ta kisas p’esey e ‘Final Agreement’ mester wordo firma den exterior?
E postura populista di nos parlamentarionan ‘Pabien’ den e ‘CITGO-deal’, ta ilustra claramente cu nan tampoco tin pueblo su interes na pecho, pero solo nan mesun interes y esun di partido. Pues esey ta e rol importante cu nan a hunga den e reapertura di e refineria. P’esey hunto cu e gobernantenan, nos parlamentarionan ‘Pabien’ mester wordo poni personalmente responsabel pa e aventura biyonario ‘CITGO-deal’ y e aumento di e debe nacional cu algun biyones mas!
(www.aboaruba.org, This email address is being protected from spambots. You need JavaScript enabled to view it.)
Expresionnan haci den e articulo aki no necesariamente ta refleha opinion di ArenaPoliti.co