Partido UPP den fin di siman a tuma nota con Gobierno di Aruba, den un forma triunfante y yen di beheid, cu abraso y batimento di lomba, a haci e anuncio di e acuerdo cu lo tin na caminda.
Despues nos por a tuma nota di e euforia grandi cu tabata tin y tin ainda, unda cu atrobe nos politico- y parlamentarionan ta purba busca e credito necesario pa loke lo ta e eventual reapertura di e refineria. 

Medio december 2015, UPP a haci un apelacion fuerte riba e.o. nos Parlamento pa trata e asunto di e posibel reapertura di e refineria cu mas seriedad y diligencia. Esaki pasobra nos a tuma nota e tempo ey cu tur partido den Parlamento, y Parlamentario, y Ministernan, tabata purba di claim e corona, y haya e merito pa e logro di e reapertura cu tabata vislumbra fin di 2015.

Nos a haci un apelacion pa no cuminsa bende e cuero prome cu mata e baca, mirando cu ta trata di algo importante pa Aruba, tanto pa su aspectonan socio-economico, laboral, financiero di Aruba, como tambe aspectonan manera salubridad, ambiental, huridico, y interes general di pais.
Atrobe nos ta mira cu e rancamento di siboyo t’ey, mientras cu no tin ningun claridad riba hopi aspectonan pa cua nos a pidi atencion di Parlamento fin di 2015.
Nos kier bolbe enfatisa, manera poni den e programa di partido UPP pa eleccion 2013, cu e.o. puntonan importante di salida di UPP ta, cu na momento cu ta stimula economia, esaki mester ta basa riba un desaroyo duradero, pero cu respet pa naturaleza.
UPP ta respeta y ta na fabor pa stimula iniciativanan particular cu ta contribui na e crecemento economico, social y spiritual di nos pueblo, y cu ta desemboca den e prosperidad y bienestar pa nos pueblo.
Pues UPP ta kere cu mester duna na e inversionista, tanto local como stranhero, e espacio pa haci negoshi y ganashi, pero poniendo nos hendenan y nos mama tera central, basa riba e concepto di People, Planet & Profit.
Tambe nos tin cu bisa, cu UPP su opinion ta - y esaki tambe ta poni den nos programa - cu mirando e “settlement agreement” entre gobierno y Valero, cu Parlamento na 2010 a aproba den su mayoria absoluto, cu na 2013 a scohe pa un Aruba sin refineria. Esaki mirando e desaroyo stanca na San Nicolas en particular. P’esey UPP tabata faborece un desaroyo nobo y duradero riba e tereno, cu e.o. industria limpi y high tech, cu lo a stimula economia, percura pa un medio ambiente mas protehi, y un salubridad publico balansa pa e pueblo di San Nicolas.
Tambe e desaroyo aki lo mester a percura pa oportunidad pa nos yiunan di tera cu estudio avansa, practica nan ofishi y conocemento como un centro di tecnologia moderno.

UPP a admiti tambe na fin di 2015, cu ya caba desde e “crisis constitucional di ensure” y e binimento di Cft (awo CAft) na 2014, a adapta su punto di bista riba un Aruba sin refineria, pero mas bien como un “malo” bon, un necesidad, pa yuda enfrenta e situacion cu Gabinete Mike Eman a hinca Aruba aden. Esta di un malgastamento di placa, y aumento di nos debe nacional, cu a conduci na protocolnan cu Hulanda, cu al final ta e Pueblo ta wordo castiga cu medida.
Un eventual reapertura di refineria ta wordo mira desde e tempo ey como un necesidad pa riba termino rapido enfrenta e situacion di nos crisis economico y financiero di pais. Cu na su turno tin efecto riba nos situacion socio-economico, na nivel nacional, pero tambe na nivel di nos famianan, cu ya no tin entrada mas.
Tambe nos a mustra e tempo ey cu motibonan di desmantelacion tanto den Camara di Comerica, ATIA y seno di Gobierno y partido AVP, tabata mas bien basa riba e beneficio cu esaki por a trece pa tanto cierto companianan, como personanan liga na e partido berde.
Mescos Valero mes, cu a haya e transhipment facility di e refineria. Pues aki nos por mira cu e maneho tabata dirigi riba e otro “P”-nan, cu no ta esun di People, Planet & Profit. Mas bien tabata dirigi riba e concepto Placa, Probecho y Poder.

Nos a mustra tambe cu e posibel reapertura tabata tin di haber cu e posicion di Hulanda. Unda via di CFt a manda e mensahe cu ta tempo pa haci algo na e situacion financiero di pais Aruba, y cu reapertura di refineria riba termino corto lo ta e unico solucion. Algo a trece e “dilemma” di Mike Eman dilanti y pone bay te Hulanda pa negosha. Aki ta unda cu interesnan Hulandes tambe a bay hunga un rol, particularmente pa loke ta asunto di uso di gas pa e refineria. Y esaki nos por a mira ora cu Minister Bermudez a admiti cu ta wanta e introduccion di ABB, pa duna oportunidad na un reapertura di e refineria.
Si esaki bira posibel, anto e ABB por bay den diepvries. Ban wak si esaki lo ta e caso awor.
UPP sigur lo no tin problema pa duna credito na su debido momento na tur esnan cu lo por tabata tin un of otro aporte den realisacion di e eventual reapertura. Pero nos no ta kere cu ainda ta oportuno pa nos bay den e discusion ey.
Mescos cu na final di 2015 UPP ta exigi, kizas ta laat caba, pa atende e “acuerdo” na un forma mas diligente, y no presenta na Parlamento un “acuerdo” cu ta un hecho, un “fait a compli”. Nos a pidi nos Parlamentarionan pa for di un fase tempran, urgi na gobierno pa wak ki sorto di “settlement agreement” ta bay bin cu ne atrobe. Mira pa e interes di pais wordo sirbi na prome lugar, riba e puntonan cu nos a menciona, esta esun socio-economico, financiero, legal, laboral, ecologico y salubridad.
Tambe wak pa haya e.o. e transhipment facility di nos refineria bek, mescos cu esun di distribucion, y pa nan bin den man di Pueblo. Y for di unda e ganashinan por wordo aloca den un fondo pa Enseñanza. Tambe riba e aspecto laboral, con nos lo bay na garantisa proteccion di nos forza laboral local.

Tin hopi aspectonan cu mester di claridad prome cu nos por bay bira eufurico y yega te na bay bringa cu otro caba di awor ta ken a logra e reapertura. Si esaki ta bay bira e tono di e discusion, anto ya caba nos ta premira cu contenido di e “acuerdo cu CITGO/PDVSA” lo tin menos importancia ora cu e reunion di Staten bini. Mas bien lo e bolbe bira e acostumbrada debate di acusacion y exigimento di merito, mientras cu e interes general mes lo ta esun cu lo sali perdi.


Den nomber di Union Patriotico Progresista – U.P.P.
Candelario A. S. D. – Booshi – Wever
Brazil, mei 18, 2015

Expresionnan haci den e articulo aki no necesariamente ta refleha opinion di ArenaPoliti.co