Mike a para bira e berguensa di Reino

E revista Hulandes Elsevier a publica cu Minister Eman hunto cu e otro Prome Ministernan di Corsow y Sint Maarten no lo atende e Concierto di Reino pa conmemora e 60 anja di Statuut como muestra di protesta. Un acto asina biniendo di Mike Eman sigur ta un falta di respet y insulto na cas Real, vooral pasobra cu Mike semper tabata e ‘braafste jongen van de klas’ cu tabata tin semper palabra di elogio so pa tur locual ta trata Reino Hulandes. 

Ta na unda e Mike como ‘bruggenbouwer den Reino’ a keda?Hustamente awor cu tin tanto problema entre e Gobierno di AVP cu Hulanda, hustamente despues cu Mike a tira palabranan duro den direccion di Gobernador den representacion di nos Rey, bo lo a spera cu Mike lo a bay pone pleister riba e heridanan cu su presencia na e Concierto di Reino. Pero Mike a cobardia y no a bay Hulanda. Na su lugar Mike a duna e excusa cu e mester bay Miami riba supuesto invitacion di ex President Bill Clinton pa bay duna speech riba su vision berde. Esta un berguensa! Enves cu Mike a busca manera pa drecha e relacion di su gobierno cu Hulanda, e ta opta pa bay ganja den foro internacional cu su maneho a yuda Aruba. Di e ‘braafste jongen van de klas,’ Mike a para bira e berguensa di Reino!

Expresionnan haci den e articulo aki no necesariamente ta refleha opinion di ArenaPoliti.co