Pueblo di Aruba, relaciona cu e firmamento di acuerdonan entre gobierno di Aruba y e compania CITGO Petroleum Corp., pa reapertura di e refeneria na Aruba, tur hende por a mira con PM Eman a score masha halto mes. Por menciona aki riba dos tereno. E prome ta politikeria. PM Eman a luci como e heroe den tur e asunto aki. Politicamente e firmamento aki ta duna Eman un rosea y por yuda extende su bida politico. Eman a gaba bisando cu e firmamento aki ta parti di nan maneho gubernamental. Esaki ta parti di AVP su ainda falta despues di un bon trabao! Politicamente PM ta pronkia cu e firmamento y ta score 100 punto cu ta e score maximo. Consecuencia politico por nifica cu esnan cu ta bao di e hipnosis berde di PM Eman, cu lo keda den trans y manera un zombie, keda admira PM Eman.
E di dos ta porkeria. Aki tambe PM Eman ta haya 100 punto. Simplemente pa su declaracionnan cualnan ta wordo categorisa asina. Dicon? Na prome lugar, NUNCA gobierno di AVP tabata kier a habri e refineria. Semper gobierno tabata kier a desmantela. Siguiendo e lista, e fraccion di AVP, na varios ocasion a vota contra tur mocion den Parlamento di Aruba cu tabata na fabor di reapetura di e refineria. Tur votacion tabata 13 contra; AVP a vota hasta contra pa para desmantelacion, of no? Lider di fraccion sr. Herde a haci bofon di tur cu tabata haci esfuerso pa logra reapertura.  Sr. Melvin Tromp a declara cu ta cosnan priva y di placer sr. Glembert Croes ta bay haci na Venezuela. Sr. Otmar Oduber hunto cu A.I.B., representa pa sr. F. Giel, a compila un plan di desaroyo pa San Nicolas den cual ningun momento a inclui e posibilidad di reapertura di e refineria. Solamente pinta muraya, supuesto shopping malls y museonan. Tambe Otmar Oduber y Mike de Meza a firma acuerdo na Santo Domingo pa e hotel cu mester a bini den Colony. Presidente di Parlamento ta vota contra e refineria ultimamente, declarando pasobra su gobierno no ta consistente den nan maneho! Pa por tuma e pulchi di reapertura, PM Eman a pidi pa e refineria ta green. Ta e demanda y e necesidad di Venezuela pa un refineria cu por trata nan petroleo pisa a haci e refineria atractivo. E inversion ta hopi menos pa Venezuela uza e refineria na Aruba cu traha uno na Venezuela. Tambe e envolvimento di Glembert Croes como uno cu a lobby cu esnan di influencia na Venezuela, a haci e refineria atractivo.
De Meza a haci plan si pero cu Roberto Rincon kende ta cera na USA pa bribery y corupcion. Posibel sponser di partido politico AVP anto den dollars cash!!
Reapertura ningun momento ta danki na un empeño of logro di e gobierno di AVP. No tabata tin un bon trabao y e reapertura no tabata den planning di ainda falta. Pesey tur loke PM Eman a gaba cun’e ta wordo categorisa porkeria enbes di politikeria. Contra su boluntad e ta firma y conscientemente e ta gaña pueblo di Aruba cu ta su gobierno a logra.  Nada di loke PM Eman a declara ta berdad y esaki si ta e berdad.

Expresionnan haci den e articulo aki no necesariamente ta refleha opinion di ArenaPoliti.co