Prome Minister Mike Eman: E merito ta completamente na mi colega Minister di Energia ing. Mike de Meza
![Mike35](/images/2016-press/Mike35.jpg)
Relaciona cu reapertura di refineria na San Nicolas.
Debi na su determinacion inmensamente grandi awe Aruba por ta sumamente contento cu nos a yega na e acuerdo importante aki.
ORANJESTAD - Durante e encuentro cu miembronan di prensa sosteni dialuna mainta, Ministernan Mike Eman y Mike de Meza a duna splicacion extenso riba un cantidad grandi di topiconan relaciona cu reapertura di refineria na San Nicolas. Prome Minister Eman a splica cu reapertura di e refineria ta un di e puntonan cu Banco Central di Aruba na 2009 a mustra cu ta di sumo importancia pa Aruba por recupera su perspectiva economico pa futuro y awe e ta un realidad. E no tabata un proceso facil, sigur hopi largo y intensivo, pero awe e ta un realidad.
Prome Minister a recorda cu algun siman prome cu a firma e acuerdo cu Citgo, hunto cu Minister de Meza, el a recore San Nicolas pa informa nan mes di e diferente proyectonan cu tin ta tumando luga. "Nos a cana y bishita hopi tienda y cada un di nan a puntra nos e mesun pregunta: ki dia nos ta tende algo di e refineria, ki dia nos ta tende algo di e refineria, paso claramente ora cu e refineria ta opera na San Nicolas, nan ta sinti cu e poder di compra ta mucho mas halto cu na e momentonan aki," Prome Minster a splica. "Esaki ta un realidad cu henter Aruba ta bay conoce e impacto di dje, pero siguramente San Nicolas, cu ta mas cerca di e operacion di e refineria, ta bay conoce un impacto positivo hopi grandi y pa cual tambe palabra di felicitacion na e minister cu ta e minister tambe cu un curason hopi special pa San Nicolas y nunca a stop di keda busca un solucion pa e refineria."
Sr. Eman a splica cu tabata tin momentonan rond di 2014 cu nan a haci e ultimo esfuersonan pa por yega na habri e refineria bek. El a recorda cu a negocia cu PdVSA, EcoPetrol, PetroBras, PetroChina, Rubiales y un cantidad di otro companianan, pero e cinconan mas grandi ta traha extensivamente riba nan durante añanan 2009 te 2013. "Mi mes como Prome Minister a pensa cu ta yegando na e punto pa nos cera e capitulo aki y pa nos busca un redestinacion di e area aki, pa nos por sigui cu e desaroyo di nos pais y sigui cu e desaroyo di San Nicolas." Pero Prome Minister a enfatisa cu, "Nos Minister di Energia a keda traha riba e ultimo luz cu ainda tabata tin pa un posibilidad di haya un partner y berdaderamente tabata tin un 'breakthrough' importante, e merito ta completamente na mi colega Minister di Energia."
El a expresa, cu hopi frankesa, cu hopi temanan grandi di su gobierno, el a carganan hunto cu su coleganan pa sigura cu nan ta sosode. Den e tema di e refineria tambe, sr. Eman ta splica, cu el a cana hopi aña cu colega de Meza riba e tema aki, tur nan a bay hunto, a bringa hunto, hasta PdVSA, el a recorda, cu el a bisa den un discurso na Venezuela cu e tabata conoce sr. Astrubal Chavez, e tempo ey minister encarga cu asuntonan petroleo y minas di e pais, su number di telefon for di su cabes, debi na e cantidad di biaha cu a yam'e pa haci follow-up pa por haya un breakthrough pa reapertura di e refineria. Esey tabata e tempo cu a haye cera y tambe ora cu Valero a habri bek, pero a anuncia despues cu e ta cerando atrobe. E ta splica cu hopi esfuerso a wordo haci, pero sr. Eman ta enfatisa cu, "e ultimo esfuerso aki, merito completamente na mi colega de Meza cu si a kere ainda den e ultimo luz aki y a persigui'e cu un determinacion inmensamente grandi y awe Aruba por ta sumamente contento cu nos a yega na e acuerdo importante aki."
Prome Minister ta splica cu su contribucion na e proceso aki tabata uno como parti di e contenido. Su deseo ferviente tabata cu, si en caso tin un reapertura di e refineria, e lo mester ta mas 'berde' cu ta posibel. "Mi a comparti cu colega de Meza, cu pa nos gobierno, y mi ta sigur cu e tambe tabata di e mesun opinion, e lo no tabata aceptabel pa nos a bay bek na unda nos tabata anteriormente cu e refineria tabata saca e huma cu nos tabata conoce anteriormente," Minister Mike Eman a enfatisa y sigui splica cu, "e mester ta un refineria cu mucho menos emision of nada di emision, y asina nos a yega tambe na condiciona e operacion di e refineria cu e tin cu draai riba gas pa asina nos por minimalisa e cantidad di emision."
Tambe a acorda cu Citgo, algo cu Prome Minister ta considera hopi importante, futuristico y innovador, e proyecto pa por capta carbon (Carbon Capture). Esaki ta un idea cu ta parce prome cu su tempo y rond di mundo Aruba ta bay ta un di promenan pa implementa algo asina den un escala asina grandi y den un refineria. Den e proyecto ta bay capta carbon y converti esaki den un cultivacion di algen. E ta un proyecto sumamente innovador, cu ta existi caba na Universidad di Wageningen, caminda cu TNO hunto cu Wageningen, tin un modelo cu Prome Minister a bishita, durante un di su ultimo werkbezoek cu su consehero y director di Algemene Zaken, sr. Piet Pronk, q.e.p.d. "Ey, nos a pone e prome contacto pa e proyecto por bin Aruba y den e contracto, Citgo a aloca un fondo bastante grandi pa haci e proyecto aki bira un realidad."
Expresionnan haci den e articulo aki no necesariamente ta refleha opinion di ArenaPoliti.co