Minister Ing. Mike de Meza: Sindicato y gremionan ta contento cu informacionnan ricibi riba reapertura di refineria
ORANJESTAD – Minister President mr. Mike Eman hunto cu Minister di Asunto Economico y Energia ing. Mike de Meza, como tambe Minister di Labor drs. Paul Croes a sinta cu sindicato IOWA, contratistanan local, como tambe varios gremionan comercial pa asina actualisa riba e avancenan haci relaciona cu reapertura di refineria na San Nicolas. E reunionnan a tuma luga na sede di YMCA y tambe na oficina di gobierno na San Nicolas, a conclui cu representantenan contento y satisfecho, segun Minister Ing. de Meza a indica. Esaki ta djis e prome den mas encuentro programa cu e obhetivo di involucra tur partido concerni pa traha hunto na bienestar di nos isla.
Delegacionnan di Aruba Hotel & Tourism Association (AHATA), Camara di Comercio, San Nicolas Business Association (SNBA) y asociacion di contratistanan di Aruba (WAB), tambe a haya splicacion for di boca di e propio Ministernan y miembronan di e team negociado riba e acuerdonan firma cu CITGO, con leu cosnan ta, kico por spera y con e por beneficia nan. A papia tambe riba e proceso di rehabilitacion cu ta inicia dia 1 di augustus proximo y kico lo ta e modelo di operacion di e refineria. “Tabatin hopi pregunta, cual tur a haya contesta. Cada representante a keda contento cu informacion ricibi, pero tambe a felicita y gradici nos pa e trabou haci,” asina Minister ing. de Meza a comenta.
Parti mainta a reuni cu e sindicato IOWA cu ta e sindicato di trahadonan di refineria di Aruba y tambe cu tur e contratistanan Arubiano. Ambos a sali sumamente contento y gradici pa e informacion detaya cu a comparti cu nan, loke ta refleha transparencia. Ministernan a contesta preguntanan personalmente y tambe miembronan di team negociado di e acuerdo a elabora riba preguntanan mas detaya. IOWA tabatin oportunidad di trece tur nan puntonan di dilanti y un pa un a pasa riba nan.
Gabinete Mike Eman a reitera cu Citgo Petroleum Corporation kier traha cu tur esnan cu a yega di traha den e refineria sea cu nan ta na Aruba of den trahando actualmente den exterior. Nan ta consciente cu esaki ta e personanan cu miho conoce e refineria y ta mas capacita pa realisa su rehabilitacion. Di otro banda, Gobierno y sindicato ta consciente cu tin un vergrijzing tumando luga den e grupo laboral aki. Y esey tambe ta un punto cu a wordo trata.
IOWA a bin cu e sugerencia pa facilita entrenamento den ramo tecnico di e industria na, por ehempel, e studiantenan di EPI. Gobierno ta dispuesto pa sinti hunto cu e sindicato pa hunto cu tur otro partido yega na un sistema cu hisa e nivel di educacion tecnico y cu hobennan por haya no solamente e educacion, pero tambe cursonan cu ta hiba nan na un trabou den e refineria.
Ya caba tin un reunion programa pa e siman aki caminda Gobierno ta bolbe sinta cu e sindicato pa, e biaha aki, profundisa riba e tema di posicion huridico. Fuera di esey, Minister ing. de Meza ta sinti hopi bon di wak con tur hende ta cla pa cuminsa traha. Tambe den e proximo stapnan ta inclui un reunion caminda formalmente Gobierno ta introduci e representantenan di CITGO Aruba na tur e stakeholdernan local.
Expresionnan haci den e articulo aki no necesariamente ta refleha opinion di ArenaPoliti.co