ORANJESTAD – Minister President Mike Eman a papia cu sindicato, contratista y gremionan den e siman tras di lomba como parti di e proceso di comunicacion cu tur stakeholder den reapertura di refineria. Ta importante pa tin transparencia y participacion ya cu asina tur hende ta beneficia di e impacto economico cu esaki ta bay tin. “Nan ta hopi contento cu e informacion cu a haya y kico ta e condicionnan pa garantisa cu e mercado laboral local ta haya e oportunidad husto,” asina Premier Eman a declara na su salida for di e reunionnan sosteni na YMCA San Nicolas.

“Esaki ta e siguiente fase despues di a yega na firma e acuerdo pa haci reapertura di refineria. E impacto directo ta creacion di centenares di cupo di trabou,” segun Prome MInister Eman. Hunto cu coleganan ing. de Meza di Energia y drs. Croes di Labor, a reuni cu sindicato IOWA cu pa hopi decada ta envolvi cu e refineria y tin hopi experiencia y conocemento. Tambe a reuni cu un cantidad grandi di contratista cu tin e conocemento pa capitalisa riba e momento aki. Tambe a reuni tambe cu e gremio comercial ya cu pa nan tambe e impacto economico ta hopi importante. Ta papia aki cu ta bay tin rond di 3 mil persona cu lo ta activo paden y rond di e refineria.

Premier Eman a duna di conoce cu reapertura di refineria ta representa un aumento di 15% riba nos GDP y tin un efecto riba e comercio en general na Aruba, como tambe e poder di compra di nos hendenan. For di tempo cu e refineria a cera, nos pais ta depende riba e sector turistico pa obtene e divisas cu tin mester pa importacion; algo esencial mirando cu Aruba ta importante 95% di su necesidadnan. Danki na e bon trabou di Minister Oduber y otro stakeholders, a mira un crecemento grandi den turismo, un aumento den placa pa camber y loke e turista ta laga atras compara cu 2009. Asina por a compensa parcialmente pa e cantidad di divisa necesario.

Minister President Eman: “Cu dos fuente di ingreso di divisa, bo ta mas duro para. Pa nos como gobierno ta un momento hopi importante. Esaki ta representa un entrada adicional considerabel pa e presupuesto di Gobierno, e ta yuda hopi cu e poder di compra den sociedad.” E ta señala mas aleu cu e e retonan cu Banco Central a mustra riba dje bek na 2009, Gobierno a percura pa atende cada un di nan. A reforma e fondonan di pension, a percura pa e industria turistico ta fuerte, y e deficit ta bahando dor di tur e inversionnan haci pa renobacion di bario, centro di ciudad, espacio publico, a aumenta poder di compra; y awo ta toca pa enfoca riba e balansa riba presupuesto, ta logra reapertura di e refineria cu ta bay yuda grandemente.

“E ta duna mi sentido grandi di orguyo ora mi mira cu ta ‘check off’ e diferente puntonan riba e lista. Nos ta cumpli cu loke nos a priminti y ora a bisa cu tabata falta, esaki ta hustamente entre e cosnan cu tabata falta,” asina Prome Minister Eman a finalisa bisando.

Expresionnan haci den e articulo aki no necesariamente ta refleha opinion di ArenaPoliti.co