A yega na acuerdo cu CITGO. 

ORANJESTAD - Den un sala di prensa yen, Prome Minister Mike Eman, Minister Mike de Meza, Minister Paul Croes y team negociado e completo di e acuerdo cu CITGO di Aruba, a trece e bon noticia pa comunidad di Aruba: a yega na un acuerdo final cu CITGO y e fecha pa reapertura di e 'refineria' ta tuma luga dia 1 di augustus. Parlamento mester aproba un ke otro ainda. Den un comunicado conhunto cu CITGO gobierno di Aruba ta haci anuncio di e gran logro aki. Prome Minister Eman visiblemente emociona a felicita su colega De Meza cu e tremendo logro aki y tambe cu su cumpleaños. Un dia di dobel fiesta, un dia di dobel alegria y dobel celebracion.

Cu reapertura di e refineria Aruba ta haya un inyeccion grandi cu lo percura pa un crecemento economico cu ta hisa e GDP cu alrededor di 15%. Eman: "Esaki ta algo sumamente grandi cu nos pais lo brasa cu hopi aprecio mirando su efecto enorme pa un futuro positivo pa Aruba." Eman ta corda con na 2009 ora su gobierno a tuma responsabilidad pa guia e pais aki, Presidente di Banco Central a haci un declaracion. "El a describi e retonan cu pais Aruba tabata confrontando na e momentonan ey. E retonan economico y di stabilidad financiero. Tambe el a bisa cu solamente ora bin claridad riba e futuro di refineria di Aruba, cu turismo por stabilisa, cu e fondo di pensioen di AOV, e fondo di pensioen di APFA, e stabilidad financiero rond di AZV bin den un balanse y ekilibrio y gobierno reduci su gastonan, su deficit y personal, e ora so e futuro di nos pais por ta briyante." Eman a splica cu e gobierno cu a tuma rienda na 2009 di pais Aruba a bin ta traha sistematicamente riba cada un di e puntonan aki.  "Awe para boso dilanti aki nan cu e noticia cu nos a yega na e acuerdo final cu CITGO cu tabata e unico punto riba e lista di e Presidente di Banco Central cu mester a wordo realisa, nos por bisa cu nos a cumpli cu locual mester a cumpli." Tur e otro puntonan a haya nan atencion y a wordo cabalmente realisa. Eman a sigui bisa cu ta un momento historico y grandi pa Aruba. Prome Minister tabatin hopi palabra di elogio pa e dedicacion y perseverancia di su colega de Meza, kende a keda semper kere den e proyecto aki, hasta ora e mes tabatin su dudanan. "Mi tin un minister di energia cu hopi energia y a keda busca e ultimo 'apertura' cu por tabatin pa por a yega na realisa e contactonan, sigui pa e negociacionnan cu e compania CITGO na Houston y perdura riba e tema aki pa  finalmente logra cu awe tin un acuerdo riba mesa." Despues di e palabranan elocuente aki a sigui un manancial di aplauso. Aruba a logra.

Expresionnan haci den e articulo aki no necesariamente ta refleha opinion di ArenaPoliti.co