Minister de Meza y team negociador a logra un acuerdo final cu CITGO. 

ORANJESTAD- Minister de Meza durante un declaracion cortico na prensa a cuminsa na felicita pueblo di Aruba y su coleganan pa e acuerdo final cu a logra cu CITGO. Tambe el a yama su team, encabesa pa mr. drs. Richard Arends un pa un danki pa nan trabou duro. De Meza: "Awe, diabierna 13 di mei 2016 mi ta anuncia cu oficialmente tin un acuerdo cu CITGO pa loke ta reapertura di e refineria na San Nicolas. Pabien tur hende. Pabien na e  Arubianonan trahando den exterior y cu kier bin bek nan pais. Nan por cuminsa prepara pasobra pronto e acuerdo aki ta keda formalisa den ley. Nan por bin bek y yuda den e desaroyo economico di Aruba. "

De Meza, un habitante di San Nicolas a bisa di ta masha contento cu e logro aki pa San Nicolas y e hendenan cu ta biba eynan. "E acuerdo aki ta tremendo pa henter Aruba, pero specificamente pa San Nicolas y su hendenan humilde". El a conta con ora mas di un aña y mey pasa el a papia cu Prome Minister riba e posibilidad cu a presenta y cu mester cuminsa cana e caminda aki. "Esaki tabata despues cu nos a bay tur caminda rond mundo pa busca un posibel operador pa e refineria. Na september di 2014 nos a firma un Memorandum of Understanding (MoU) pa despues bay den e periodo di Head of Agreements, ora a caba cu esey nos a bay cu e fase final di e acuerdo definitivo y esey ta unda nos ta awe."

"Awor e documentonan ta wordo poni pa formalisacion di henter e acuerdo aki y envolvi tur esnan cu ta participe den e ceremonia di firmamento y tambe defini unda e documento ta bay wordo firma. Nos ta trahando caba riba e documentonan cu tin cu bay Parlamento pa ahustenan den leynan existente. Tambe nos ta bay crea dos compania. Un estatal cu ta yama Refineria di Aruba cu ta bira doño di tur loke tin na Seroe Colorado San Nicolas y un otro compania estatal cu ta bay opera e local marketing cu ta e compania cu ta suministra y distribui gasolin, diesel, fuel oil, jetfuel etc. pa e consumo local. " E refineria for di prome dia ta bay draai riba LNG, loke ta haci'e e prome refineria berde den e hemisferio aki.

Expresionnan haci den e articulo aki no necesariamente ta refleha opinion di ArenaPoliti.co